10 نوفمبر 2007

اسماعيلاوي ارتدى زي النادي الأهلي

على عكس كتير من أبناء جيلي - والأجيال السابقة ! - أعتقد إن انتماءي الكروي جه متأخر شوية

في مرحلة مبدئية من حياتك قد تتواءم مع بداية نطقك للكلام بيكون عليك الاختيار بين إنك تكون أهلاوي أو زملكاوي .. ولإني أزعم محاولتي دائماً الانتماء للفطرة الخيرة - البعد عن الفطرة الشريرة كمعنى أدق - قررت ببديهية الخيرين إني مش هشجع الأهلي ، وكاستدلال منطقي - وإن كان غير محدد من ناحيتي - لقيت نفسي بشجع الزمالك على طريقة "الزمالك كسب .. طب فل ، الزمالك خسر .. طيَّب !" - والأخيرة هي المستخدمة غالباً - بشكل عام الزمالك مكنش بيفرق معايا بأي شكل لكن كان دايماً في دافع خفي بيفرحني لما الأهلي يخسر في الدوري المحلَّي تحديداً .. ربما لأن ذلك وسيلة لأن تشمت في أغلب أصدقائك اللي مطعين عين أهلك على طريقة "خدتوا ستة رايح .. خدتوا أربعة جاي" .. ومع ذلك لا أخفي اعجابي بالكرة اللي كان بيقدمها الأهلي في بعض الأوقات - 2005 تحديداً - عن طريق أبو تريكة وبركات ومتعب بشكل متفاهم جداً بيظهر جماليات الكرة بشكل كبير وهو أكتر شيء بحبه في اللعبة حتى لو عن طريق فريق مش بحبه .. ولا أخفي أيضاً حبي الغريب لمحمد أبو تريكة وابتسامته ! وأعتقد - بصرف النظر عن خطيئة انتماءه للأحمر - هو أكتر لاعب كرة حبيته في حياتي .. بدءً من قيادته لفريقه .. ووصولاً لابتسامته الساحرة .. مروراً بهدوءه وأخلاقياته وتديُّنه .. مهاراته الكروية المميزة .. وروحه الرهيبة في الملعب أيًّ كان الفريق اللي بيلعب له سواء الترسانة أو الأهلي أو المنتخب ..

المهم عن طريق حكاية مملة هبقى أحكيها بعدين وصلت لإن الإسماعيلي بيلعب أحسن كرة في مصر .. كرة مهارية وسريعة بتشكل بالنسبة لي النموذج المصري الأقرب لمعنى كرة القدم القايمة على إنك ( تلعب ) مش بس إنك ( تكسب ) ، ومع المتابعة المستمرة من يناير 2006 حتى سبتمبر من نفس السنة .. فهمت يعني إيه تنتمي لفريق، اللي هو تفرح بجد لما يكسب .. تزعل لما يخسر أو يتعادل .. تطنطط لما يجيب جون .. وتفضل على أعصابك وانتَ بتتفرج على ماتشه ..

كل اللي فات يبدو مقدمة جيدة عشان أتكلم عن ماتش الأهلي والنجم الساحلي اللي اتلعب إمبارح على استاد القاهرة وخسره الأهلي 3-1 وخسر معاه الاحتفاظ باللقب الأفريقي

الكُرْة غير المحدود اللي بتكنه محافظات القناة للأهلي واللي ظهر ليَّ عن طريق رابطة مشجعي النادي الإسماعيلي اللي أنا منتمي ليهم على النت - حتى أننا لا نتحدث عنهم سوى بالحُمر ولا أعرف لماذا ! - مكنش مبرر بالنسبة لي عشان أكون ضد الأهلي إمبارح أو حتى قبل كده في أيًّ من مباريات البطولة

أزعم بالفعل إني إسماعيلاوي مُتعصب - رغم عدم انتماءي لمحافظة الإسماعيلية - ومع ذلك أعتقد إني كنت حزين لخسارة الأهلي أكتر من حزني لخسارة أي بطولة تانية أفتكرها على المدى القريب !

كنت قبل الماتش ده وفي ماتش سوسة في الذهاب وفي كل ماتشات البطولة بشجَّع الأهلي .. بس كنت معتقد إني هشارك في الفرح بس ولو لا قدر الله حصل حاجة والأهلي خسر مش هزعل - زي ما حصل في ماتش الهلال مثلاً - و هواسي أصحابي بكلمتين وخلاص ، بس اللي حصل إني مضايق بجد ولحد دلوقتي .. مش فاهم ليه !
بس حاسس فعلاً إني خسرت حاجة قيَّمَة بعد ما بقت تقريباً في إيدي
حاسس إني زعلان على الناس وعلى اللعيبة بجد

مش عارف الموضوع ليه علاقة بانتماء لبلد وإن الأهلي بيلعب باسم مصر ولا لأ

بس اللي أعرفه إني كنت مبسوط أوي من إحساسي على القهوة وإحنا متجمعين وبنشجع الأهلي بحماس ومع كل كرة نقوم نقف .. ومع كل غلطة تحكيمية نشتم الحكم بشتايم قبيحة .. ومع جون الأهلي حضنت واحد معرفوش ! ، كان نفسي فعلاً أفرح مع الناس دي بالكاس ونكوَّن مع بعض لحظة مش هتتنسي .. وكان نفسي الخمسين ألف اللي راحوا الاستاد ودفعوا من جيوبهم مبالغ تذاكر مستفزة واستحملوا الشمس والضرب والبهدلة والعطلة في الاستاد أكتر من ساعتين بعد الماتش لحد ما الزعيم يروَّح بيته وياكل رز مع الملايكة .. يفرحوا هما كمان بحاجة من الحاجات القليلة اللي بترسم بسمة على شفايفهم !

استفزيت أوي من فرحة الزملكاوية بفوز النجم !
ومش موافق على فرحة بورسعيد والإسماعيلية وإن كنت متفهم تماماً أسبابها ودوافعها - التفهم لا يعني الموافقة بالتأكيد -

عموماً
الأهلي لعب ماتش كبير .. كل اللاعيبة تقريباً أدت المطلوب منها .. ولحد طرد النحاس كان المباراة في إيدنا .. وحتى بعدها كان ممكن ده يحصل ، بس هي دي الكورة ! ..

أنا مش جيَّد أوي في المواقف الوطنية اللي بتأثر الألباب !
بس باعتباري مضايق زيكم بالظبط .. ويمكن - بقول يمكن - أكتر
عايز أقول هارد لك ( لينا ) فعلاً .. معلش لعلاء وعبد الرحمن وحسين ويوسف وأيمن وياسر اللي شافوا الماتش معايا النهاردة واتنكدنا سوا .. معلش لياسمين وياسمين ومصطفى ورامز وشيرين وسلمى وبسمة وفؤاد وشريف ورامي اللي رغم انتماءهم للزمالك بس أكيد برضه كانوا زعلانين - محدش يكسفني يا عيال ويقول لأ ! - .. معلش لخمسين ألف متفرج كانوا في الملعب ودفع كل واحد منهم ميتين جنية عشان نفسه يفرح .. ومعلش لأكتر من تلاتين أو أربعين مليون اتجمعوا إمبارح على تشجيع الأهلي بجد .. معلش لتصرفات ملهاش لازمة صدرت من جماهير مُتَعصَبة - منهم جماهير الإسماعيلي - بتحب فرقها غلط .. معلش لأربعتاشر لاعب لعبوا النهاردة محدش فيهم قصر في حق الناس ..

هارد لك ( لينا ) فعلاً !

هناك 13 تعليقًا:

شقلوطة يقول...

كنت قبل ما أنام زعلانة جدا ..زعلانة بغباء ماحصلش قبل كده ..كان الأهلى سبب فى الزعل ده ..مع إنى زمالكاوية يعنى ..لكن تخيل إية اللى زعلنى ..متخيلة محمد أبو تريكة و هو ماشى زعلان جدا ..افتكرت عماد النحاس و هو بيبكى ..افتكرت مرات الحضرى ..و مش عارفة لية هى بالذات يمكن علشان كنا جايبين سيرتها أثناء الماتش ..كنت متخيلة شكلها قد إية هايكون زعلان و مخنوق ..و زعلت ..
....

إمبارح شفت الماتش فى الجورنال ..و معظمهم أهلاوية ..اللى وقع ع الأرض ..و اللى وشه كان محمر زى ما يكون مسلوخ من الزعل ..واللى عينيها دمعت ..و اللى و اللى و اللى
كل دول خلونى أزعل بحق ..أظن لو ماكانوش زعلوا أوى كده ماكنتش هاحس الزعل بالقوة دى ..
...........
الخيبة كلها ..ان الجورنال رياضى و الأحاديث عن الماتش استمرت كتير
:(
...
و الخيبة التانية ..ان المنافس تونسى ..عارف لو أى حاجة تانية كنت اتصبرت ..إلا التوانسة دول ..!!
...
أنا رغيت أوى ..بس أعمل إية ..كنت متدمرة إمبارح و صحيت لاقيتك كاتب تقريبا اللى زعلنى ..
ماأرغيش ؟
:)
....

صفصف مان يقول...

فعلن عندك حق يا محمد
انا امبارح زعلت لدرجة انى قومت رقصت
يمكن نشوة حزن ؟! :)
وفضلت ماشى من الحزن عمال اضحك فى الشارع وكل واحد اهلاوى اخده فى حضنى
اضمه
اواسيه
وادعليه انها تكون اول الاحزان
قصدى اخر الاحزان ان شاء الله
وبالرغم من انى مشيت من عالقهوة بعد الشوط الاول
الا انى رجعت تانى بعد الماتش
ماهنش عليا اصاحبى الاهلوية اسيبهم يروحوا زعلانين بعد ماكنت بروح انا لوحدى بعد الماتشات التانية زعلان
روحت وبرده خدتهم فى حضنى
وقعدت اضحك
قصدى ابكى بهستريا شديدة
وعلشان اخفف عنهم قعدت اغنيلهم
الاهلى فى كل حتة
بيجى فيه اجوان
ومش علشان راح افريقيا
يبقى هايرو اليابان
نيها ها ها ها

تصدق ياض انت
انت عامل زى واحد صاحبى زملكاوى وبروح امه بقوله امبارح انا فرحان
قالى بس انا زعلان
قولتله ليه ؟
قالى تخيل لما اخوك يبقى قاعد يتفرج عالتليفزيون فى البيت ويجى واحد من بره ياخد التليفزيون من قدامه

تصدق
انا كنت هقول عندك حق
بس طالما اخويا اصلن مش راضى يفرجنى عالتليفزيون
يبقى فى داهية

بس انا مستغرب انك تفتكر انى زعلان عالأهلى

يا محمد
آن الاوان للأخيار ان يفرحوا
ان لم يكن لأنتصارهم
فليكن لهزيمة الأشرار

يَحيى المِصري يقول...
أزال المؤلف هذا التعليق.
يَحيى المِصري يقول...

شوف يا أخي بيبقى في تعليقات كده تخلي الواحد ينسى هو كان عايز يقول إيه
إيييه لازم الواحد يتحمل حركات العيا.. الناس الصغيرة

أنا يمكن كانت آخر علاقتي بالكورة كانت إيام ما كان حسام و إبراهيم بيلعبوا في الأهلي و كنت زملكاوي ساعتها
بإعتبار إن أنا و بابا المناضلين الوحيدين ضد المد الأهلاوي في العيلة
المهم يا عم إمبارح كان أول ماتش أحس فعلا إني زعلان عشان نتيجته مش عشان الأهلي كان بيلعب كويس أساسا اللي شوفته في الماتش على بعضه مايكملش عشر دقايق بس أول مرة أشوف والدي و والدتي و معظم أصحابي زعلانيني كده من ساعة ماتش كانت مصر إتغلبت فيه من السعودبة ساعتها والدي كلم خالي حسيت إنه بيعزيه في حد

دنيا فيها الغالب
تاني يوم مغلوب

يَحيى المِصري يقول...

إنت مش ملاحظ إن الناس اللي إنت بتحبهم أوي كلهم زملكاوية

spellz يقول...

:D ahe di l roo7 walla balash
masrawy aseel besa7ee7 we shokran :D
msh zy l zamalkawya eli a3rfhom
wa7ed menhom alli lw l ahli byla3eb tel aviv hashaga3 tel aviv ta5ayal?

" abl l waq3a de we far7et l zmalkawya feena kont bafakar a2leb zamalkaweya mn bab l tamarod 3la l maksab we tashgee3 l ghalaba bss 5laas malhomsh naseeb eny ashaga3hom"

dana mama 3ayatet we hya wala leeha 3elaqa bl koora tesada2?
hya sa7ee7 b3d kda gabet qanat hanebal 3shan teshoof rad f3l l tawansa bs 3yatet!!
kan yoom 7azin f3lan msh 3rfa leeh

sandrill يقول...

و الله ساذج

بقى رامز كان حيزعل ,, يخرب بيت تحليق الخيال ,, ده غرّم نفسه مكالمة بجنيه و ربع بحاله علشان يعيِّد عليا بالمناسبة دي ,, تخيل رامز دفع جنيه و ربع مرة واحدة من غير أي تردد

بس و الله دمهم خفيف ,, أنا كنت زعلان بعد الماتش و تريقة الواد باسم هي اللي ظبطت المود بتاعي

اللي يزعلني بقى موضوع تشجيع الاسماعيلي ده ,, أنا كنت فاكرك بتهرج ,, دول صغيرين قوي يا ابني ,, حد يشجع فرقة جمهورها بيسافر و هو شايل اكياس طوب

بعدين إيه كل الأسامي دي ,, هو انت متعرفش أهلاوية غيري وللا إيه

سلام بقى علشان أروح عند رامز أروَّقه

محمد المصري يقول...

مهــا

آدي حد كمان بيثبت إن الفترة الخيرة لا تتفق مع الانتماء للأهلي !

يا بنتي حضرتك من الناس اللي مسموح لهم يرغوا زي ما هما عايزين من غير أسباب

أنا كمان والله افتكرت أبو تريكة .. كان ضايقني أكتر كمان إن عيد ميلاده كان يوم الماتش زي ما قريت في جرنان مش فاكرة ..

أفتكر أنا كمان لو مشفتش الماتش على القهوة ومع العيال دي مكنتش اضايقت كده ، فيه ناس عشرة ساعة ونص مفتكرش إني هنساهم :) .. كان منهم واحد قال قبل الماتش إنه هيخلص 3-2 للأهلي والنجم هيجيب الجون الأول .. هو اللي حضنته لما الجون بتاع الأهلي جه وقلت للي كانوا معايا واضح إنه واثق وشاف الماتش قبل كده ، كلنا كنا على أعصابنا وهو متهزش منه شعره وهو بيقول خليكم مش مصدقين توقعاتي
لما جه الجون التاني للنجم راح رايح ناحية التليفزيون وطافيه وراح بصوت مخنوق كده قايل لنا مش قلتلكم تلاتة اتنين ! رحنا ضاحكين كده وسط الزعل اللي كنا فيه

أهو الراجل ده مفتكرش هنساه أبداً :)

بلاش نقلب المواجع بقى

نوَّرتي يا مها ، وارغي براحتك يا آنسة .. المدونة مدونتك :)

محمد المصري يقول...

مصطفى

أهو في ناس بقى مش من حقها تتكلم أصلاً - سواء طولت أو لأ - في المدونة دي !

بس ما علينا ليقولوا ديكتاتور ولا حاجة
بصرف النظر برضه عن أي اختلاف فقهي وتشريعي ، ردك مسخرة :)

هعلمك شوية حاجات هتفيدك - أكيد - في مستقبلك

لا معنى لأن يفرح خير في هزيمة شرير على يد شرير آخر لا يعرفه ! فهذا قمة العبث

وبإيحاء أسلوبي من أحمد
فالأمر أشبه بحلقات توم جيري .. مع الوقت يصبح لدينا رغبة ملحة في أن نرى القط يهزم الفأر ولو لمرة بعد المرمطة التي يحدثها له على مدار التاريخ ، ولكننا لم نتخيل - رغم ذلك - أن يأتي فأراً آخر لا نعرفه .. يرتدي الأحمر أيضاً - ألا تجد في ذلك معنى - .. أكثر شراسة .. عوضاً عن كوننا لا نشعر معه بألفة نشعرها - رغم كل شيء - مع فأرنا الأثير عبر حلقات المسلسل ، حدوث شيء مثل هذا لا يستدعي الفرح أبداً يا بُنَي !
هل من الممكن تقبل قتل مشرط الشرير - في بيته ووسط عصابته - على يد شرير آخر جديد لمجرد أنه يزعجنا كبكارير طيبة ؟!

هزلت يا أخي !!

بخصوص استغرابك إني تخيلتك هتزعل على الأهلي .. اقرا ردي على أحمد عشان مقعدش أعيد وأزيد في الكلام

بس ختاماً
الأخ لما يتفرج على التلفزيون لوحده .. أحسن من الغريب .. أهو برضه أخ - حتى لو ابن حرام -

أقول قولي هذا وأستغفر الله لي ولكم

محمد المصري يقول...

يحيى

عجبني أوي تضفير جزء ربك هو العالم كتعليق على الماتش ، لو كنت افتكرت الجزء ده كان ممكن أخليه عنوان ، رغم إني عجبني عنواني :)

بخصوص الناس اللي بحبهم
فكتير منهم مش زملكاوي قد ما بيكره الأهلي
وده دليل مش بطال على إن الخير بين .. والشر بين
مع وجود استثناءات تثبت القاعدة - والدتي أهلاوية بلاش تضيعونا :) -

محمد المصري يقول...

Spellz

ممكن كنوع من أنواع التغيير المتسق مع التمرد على ما هو عادي ومألوف تشجعي الإسماعيلي :)
يكفي أولاً إنه أحسن كورة في مصر .. وثانياً إنه في الغالب بيمرمط الأهلي وبيمسح بيه بلاط الاستاد لما بيلاعبه :)

--

يمكن كان يوم حزين عشان إحنا ما بنصدق نمسك في خيط بيوصل لفرح ؟؟
ويمكن عشان كنا حاسين الكاس في إيدنا فعلاً فزي ما قلت في البوست .. حاجة غالية ضاعت بعد ما - تقريباً - وصلنالها ؟؟
ويمكن كمان عشان الأهلي فعلاً كان أحسن بكتير وكان يستحق وتسبب الحكم في هزيمته ؟؟

مش عارف
أيًّ كانت الأسباب .. يظل اليوم سخيف وحزين فعلأً وخلاص

محمد المصري يقول...

أحمد

نبرت فيها ياخويا وقلت هنكسب هنكسب ! قال والأهلي اتمرمط في الإسماعيلية عشان عينه على ماتش النجم ! .. الحجج الفارغة دي

بخصوص الإسماعيلي
لأ مش بهرج
الإسماعيلي فعلاً بيلعب أحسن كورة في نصر رغم إنه بيكون - زي أي فريق - سيء في بعض الأحيان ، بس متعة مشاهدة كورته وهو في قوته لا تضاهى .. على صعيد الكرة المصرية على أقل تقدير
في حاجات تانية بقى قد تبدو عبيطة بس أنا بحبها في الفرقة اللي بشجعها .. زي الجمهور اللي أنا بحبه بعبله وبعيوبه وبحماسه .. زي اللعيبة نفسها اللي بحس بترابط بينهم تحت يافطة النادي .. الزمالك مثلاً لما لاعب بيجيب جون مفيش عيَّل من زمايله بيعبره ويروح له إلا واحد أو اتنين .. شوف في ماتشات الإسماعيلي إيه اللي بيحصل ، من كام يوم كان ماتش الزمالك والحرس .. الزملك متعادل ويهمه جداً الفوز لو عايز ياخد حاجة ومع ذلك تخاذل تام من كل اللعيبة .. الإسماعيلي في المقابل عمل ماتش سيء قدام البلدية رغم المكسب .. بس في آخر نص ساعة كل واحد منهم كان بيموت نفسه فعلاً عشان عايز الفرقة تكسب .. ده شيء بيفرحني جداً في فريق بشجعه حتى لو مش هنكسب

والأهم من كل ده
إني مش بحس في الأهلي والزمالك بمدرسة كروية بتفرض نفسها .. بمعنى إن كل جيل ليه أسلوبه وطريقته اللي بتتغير حسب اللعيبة والمدرب ، الإسماعيلي مدرسة كروية فعلاً بتشكل اللاعيبة والمدرب - مهما اتغيروا - حسب روح الفريق نفسه .. بتحط الجمال في الكورة قبل المكسب ، وده في الحقيقة يهمني أكتر ..

بالمناسبة كل اللي شافوا الماتش معايا - باستثناء أيمن - كانوا أهلاوية


نيجي لموضوع رامز
لأ طبعاً متخيلتش إنه هيشجع الأهلي - وهذا ليس نفياً لفضيلة السذاجة قدرما هو توضيح صادق ليس أكثر - !!

أول ما البوست ده نزل كان من غير اسم مصطفى ورامز ، بس لما جيت قريته قلت ما تحسن الظن بيهم .. يمكن
ورحت حاططهم - حتى هتلاقيهم ورا بعض -
ولو مكنش وخذلوني كالعادة .. أهو الواحد يكون حط اسم شيطان مسلم وشيطان مسيحي ضحداً لمثيري الفتنة الطائفية :)

عموماً بخصوص رامز أفتكر إنه لازم هيكشكش خلال الفترة الجاية ، سونة أجدع ناس ناوية تبرطم بالكلام وأنا مثبتها بالعافية ، ورامز - حسب ظني بيه - ميحطش نفسه في مزنق زي ده

mano يقول...

www.goonflash.com

the best flash games on out site