23 مايو 2008

حكمة الدوري المصري



حكمة الدوري المصري في أسبوعه الأخير – والتي يمكن تعميمها لتشمل كل شيء في أرض المحروسة – تبدو واضحة : اللي ليه ضهر ميضربش على قفاه .. واللي ملوش ضهر هينام على بطنه


-----


على الهامش : ملعون أبو الإسماعيلي على أبو الزمالك على أبو الكورة لو كانت بالشكل ده

هناك 12 تعليقًا:

Hypatia يقول...

مش حاتكلم فى اى حاجه غير يوم الاحد
خليني ساكته مؤقتا

boshra mohamed يقول...

تعرف انا ماحستش بشعور بتوع الالمونيوم غير لما افتكرت اخر فرحة عظمى مريت بيها كزملكاوى وهى ماتش انبى والاهلى الشهير بتاع دورى 2003 .. تخيلت لو كان اللى بيلاعب الاهلى يومها اى فرقة تانية غير انبى اللى بيدربها مدرب زملكاوى وعندها ادارة محترمة ماتعرفش كلام من عينة " طب انتوا ايه اللى حينوبكم لما تغلبونا " وسبيت للاسماعيلى اللى كمل الطبخة وللاهلى اللى لعب قدام الالمونيوم بالفول تيم مع انه لعب قبلها مع الاتحاد بالكسر وطبعا سبيت للزمالك اللى لولا وقعته السودا ماكانش كل ده حصل

ربنا بس يستر يوم الاحد عشان ديه بجد الشعرة الاخيرة اللى فاضلة بينى وبين الفرقة ديه

ما أنا عايف طبعا !! يقول...

واضح جدا ان قنديل الحمكة بدا ينور جوه عقلك يا ابن الناصرى الزملكاوى ..

ربنا يهديك انت والنوبى وكل من صبأ

وموعدكم قريب جدا ..

بس تفتكر لو الزمالك اتلغى
ورجع تانى كشك زى زمان
ووزعوكم على الفرق التانية كمشجعين طبعا

توزيعك هيكون فين
؟؟؟

هههههههههههههههههههه
نيههههههههههه
ضحكة واحد شمتان جدا جدا جدا

محمد المصري يقول...

هو المشكلة اللي أكبر كمان من حدود الكورة هي الاضطهاد اللي بيشعر بيه الصعايدة في كل شيء بيحصل في مصر .. والنشاط الكروي طبعاً جزء من ده

الشعور بالاضطهاد ده موجود بشكل واضح في محافظات القناة وإحنا حاسينه كويس ، بس الكبت والشعور بالظلم اللي بيحسه الصعايدة أكبر بكتير ومع ذلك مش واصلنا لإنهم أبعد ولإنهم غلابة جداً جداً

الألمونيوم منزلش عشان هو أسوأ ولا عشان أقل من فرقة زي الترسانة أو الاتصالات مثلاً ، الألمونيوم نزل عشان الصعايدة هما الوحيدين في مصر اللي ملهومش ضهر
الزمالك يفوّت للاتصالات عشان طارق يحيى هو ابن الزمالك البار ، والاتصالات يخسر 3 من الترسانة عشان الابن البار طارق يحيى هيرد الجميل ومش هيكسب الكابتن بتاعه فاروق جعفر ، والإسماعيلي يفوت للمقاولون عشان المصالح المشتركة ما بين المحافظة وما بين العثمانيين ، وكل فرق الدوري تفوّت للإتحاد عشان الأرض لو تتزلزل الأخضر مش هينزل
مش فاضل بقى غير النادي الغلبان بتاع نجع حمادي هو الوحيد المهيئ لإنه ينزل عشان كل النتايج ضده ومفيش ولا فرقة ممكن تسنده

عوضاً طبعاً عن شعوري الشخصي - الطفولي والعاطفي جداً - إن الإسماعيلي خانّي بشكل أو بآخر لما اشترك في شيء دنئ زي ده وكمان كان هو الضربة الأخيرة اللي كملت على الألمونيوم تماماً

ملعون أبو الكورة اللي بالشكل ده بجد

محمد المصري يقول...

بخصوص ماتش النهاردة ، كنت مع الواد رامز إمبارح ، فواحد أهلاوي كان بيقوله "يا رب الزمالك يكسب بكرة" فرد عليه رامز قاله "لأ متدعيش يا عم ، افرض كسبنا الناس تقول كسبنا عشان دعوة واحد أهلاوي ، لأ مش عايزينها"
فالتاني قاله "لأ هيكسب ، أكيد فيه واحد زملكاوي مؤمن هيدعي إن الزمالك يكسب وربنا هيستجيبله"
فرامز رد عليه " يا عم انتَ هو فيه زملكاوي مؤمن ، الزمالك كفّرنا كلنا"

:D

ده موقف كان لازم يتسجّل مبدئياً :)

--

بشكل جد

أنا مش متفاءل خالص بالماتش اللي هيكون كمان كام ساعة

بس فعلاً أتمنى إن الزمالك يكسب ، مش عشان الفرقة أبداً ، بس عشان الواد علي أخويا لسه صغير ومش عايز يجيله ضغط وسكر بدري ، وعشان البنت الغلبانة المتغربة اللي كاتبه في الأول ، وعشان خاطر جمهور الزمالك بشكل عام .. مش متخيل إن الستين ألف اللي خلصوا تذاكر الماتش وهيكونوا في الإستاد النهاردة يرجعوا من غير الكاس
ده هيبقى الكفر بعينه والشعرة الفاصلة بحق يعني

محمد المصري يقول...

رفيق

يااااه ، عاش من شاف حاجة من ريحتك
تصدق لسه عم عبد الرحمن إمبارح كان بيسألني عنك ، قلتله ضاربها ندالة وباعد تماماً عن الجروب كله

خد بالك على فكرة إن الزملكاوية اللي بيدخلوا هنا أكتر من الأهلاوية بمراحل ، يعني لو أُهدِر باب وعلقت رأسك على باب المدونة أنا مش هقدر أتدخّل

بس يا رفيق ده انتَ معلوماتك والآبديت بتاعك قديم جداً ، ده من قبل سنة ونص يا راجل
http://nourelkhaial.blogspot.com/2007/11/blog-post.html

اقرا البوست اللي فات ده وانتَ هتفهم ، أنا نطيب في أتوبيس تاني من بدري جداً ، وبيني وبينك مكنتش راكب الأتوبيس الأولاني أصلاً

سمعنا صوتك يا أستاذ ، بلاش الغيبة دي

محمد المصري يقول...

بعيداً شوية عن البوست الرئيسي

لو مفيش سبب النهاردة يخلي الزمالك يكسب غير اللي عمله الجمهور واللعيبة لحازم إمام في البداية .. يبقى ده كفاية

لو مفيش سبب غير إن حازم محمد يحيى الحرية إمام يرفع الكاس ويختم مشواره الكروي ببطوله .. يبقى ده برضه كفاية

ألف مبروك يا حَوَش

^ H@fSS@^ يقول...

معلش استحملوني
سؤال
هو الزمالك خسر في ماتش تاني؟

هههههههههههههههههههههه
هوهوهوووووووووووووو
خخخخخخخخخخخخخخخخخخخخخخخخخخ
تاني يا فكيهة
تاني
انا مش فاكرة امتى اخ رمرة سمعت عنه كسب
هو بيلعب و لا ايه.؟؟؟

والله انا لا اهلاوية و لا سبعاوية و لا اسماعيلية
انا بشجع المنتخب لو طلع كاس العالم
فلكوا ان تتخيلوا حجم علاقتي بالرياضة ايه

هههههههههههههههههههههههههههههه
مش قادرة
بجد خسر و لاايه
خخخخخخخخخخخخخخخخخخخخخخخخخخخخ
:D

محمد المصري يقول...

يا بنتي زمالك مين اللي يخسر ، إيه الإشاعات المغرضة دي ؟
الزمالك خلاص عدى خط الفقر وبقى بياخد بطولات

عقبالنا يا رب ، نفسي قبل ما أموت أشوف محمد حمص رافع أي حاجة إن شالله حتى علبة تونة

Hypatia يقول...

we are the champions

شفت الاستاد كان عامل ازاى
شفت الاعلام كانت عامله ازاى
شفت دموع حازم امام
شفت عبدالمنصف كان جامد ازاى الماتش ده وصد بلاوي
شفت ولا مشافتش
شفت الكاس وحازم رافعه
:))
شفت جون عمرو زكي كان عامل ازاى
ده جون تاريخي
بجد بجد
ديه تانى اكتر بطوله افرح فيها لاني كنت محتاجاها جدا ولانها كانت ولاده متعسره
الفرحه رقم واحد اللى مش حتتكرر هى دوري 2003 العظيم
اغلي واعظم دوري
منافسه بجد وروح بجد وتشجيع بكل الاعصاب بجد
:))
هاااااا كانت ايام يارب ترجع

بتذاكر ولا لأ

محمد المصري يقول...

آه شفت بس يمكن أكتر حاجة فرحتني في اليوم ده فعلاً - أكتر حتى من فرحة الجمهور - كانت فرحة حازم إمام ، افتكرتك لما كنا بنتكلم مرة وقلتي لي إن كان نفسك يختم مشواره الكروي وهو مبسوط ومرتاح ، مفتكرش فيه سعادة ممكن يحسها لاعب أكتر من اليوم الاستثناءي ده ، كان نفسي أخده بالحضن بعد ما عيَّط في أول الماتش وبعد ما استلم الكاس وحتى وهو مع مدحت شلبي بعد الماتش ما خلص وكل ما حد يكلمه يقوله "ربنا يخليك .. ألف شكر .. ربنا يخليك .. ده كتير عليّ أوي" ، حب الناس ولمتهم بالشكل ده هي فرحة حازم الحقيقة

وده في رأيي أعظم تكريم يلاقيه لاعب مصري في التاريخ ، حتى لحظة اعتزال العظيم بيبو - الخطيب - وكلمته الشهيرة "ألف شكر .. ألف شكر" رغم إنها كانت عظيمة واستثنائية جداً بس مش بروعة لحظة حازم ، ومفتكرش إن فيه لاعب مصري عنده قابلية إن لحظة تركه الملاعب تكون بالعظمة دي غير أبو تريكة

بس على فكرة أكتر لاعب حسيت فعلاً إني حابه في اليوم ده - بعد حازم طبعاً - كان عبد الواحد السيد ، الله بجد لما قرر يعمل فانلات اللعيبة بصورة حازم وكلمته الجميل "لو أقدر كنت عملت فانلة لكل واحد من الجمهور اللي حضر" ، وقد إيه كان جميل وهو بيحضن عبد المنصف بعد الماتش ما خلص رغم إن تألق منصف بيقلل من فرصة مشاركته بنسبة كبيرة
من فترة طويلة جداً .. جداً مشفتش لعيب في الزمالك عنده الروح دي زي عبد الواحد ، ويا ريت فعلاً حمزة وشيكا وعمرو يتعلموا شوية بدل النفسنة بتاعتهم دي

الزمالك فعلاً ككرة ولعب ميستحقش البطولة دي ، بس كجمهور كان عظيم جداً في الماتش ده وكروح مميزة جمعت اللعيبة وككابتن تيم استثنائي مش هييجي زيه تاني .. الزمالك يستحق بالثلث

ألف مبروك يا حَوَش مرَّة تانية
عقبال لما تفكوا النحس وتكسبوا الأهلي في السوبر بقى !

mano يقول...

www.goonflash.com

the best flash games on out site