06 مايو 2008

عاجل وشكراً .. للأهمية

( 1 )

الماضي والمستقبل عملوني سندوتش
بتمرجح بينهم

( 2 )

الماضي نفاني لقدام
أنا منفي مع الأيام

( 3 )

الفجر قام ولا قمش ديك يدَّن

( 4 )

- انتَ الغلام وانتَ العجوز جداً


( 5 )

الحب عنده برد وبيعطش شجن عجوز

( 6 )

دبحتوا ليه دكر الحمام لما انتوا بتحبوه ؟!!

( 7 )

- صدقني وحش الحزن مش إنسان

( 8 )

أنا قلبي مهوش مستحمل
ده يدوبك أربع حجرات
مقفولة وضلمة
ملمومة ولمة
صور الناس اللي ما بيني وبينهم حكايات

( 9 )

متفتكرش إني نعش .. أو كبايات فاضية
أنا كبايات عصير قصب .. مليانة ع الآخر
والخلق مبتشربش

( 10 )

أنا متشرَّح

( 11 )

إلى عيون الخلق والمية :
عطشان .. ولو في دقيقة مشربتش هموت
مقتول

عاجل وشكراً .. للأهمية

( 12 )

متتوبش عن أحلامك ، متفرطش في أوهامك

( 13 )

الليل معبَّي في زكايب

( 14 )

- بانتظار النور

هناك 3 تعليقات:

محمد المصري يقول...

كل الشعر كلام ، بس كلام بيعيش

--

الشعر المكتوب في البوست لأمين حدَّاد وبهاء جاهين

مصطفى اسماعيل يقول...

لسه يابنى بتتكلم فى الاضراب
بصراحة مش هقراه
بس الشعر جميل
انا كانت اول معرفتى ببهاء جاهين امسية شعرية بعنوان البوست
وتخيل بقى يكون فيها حازم شاهين على العود
وايه حميدة
....
عندك ديوان كوفية صوف للشتا ؟

محمد المصري يقول...

هو أنا كنت اتكلمت عن الإضراب قبل كده ؟ :)

آه عندي ديوان كوفية صوف للشتا ، جبته من فترة قريبة ، بس بشكل عام بحب أسمع بهاء أكتر من إني أقراله ، صوته وإحساسه هايلين فعلاً ، والديوان نفسه فيه قصائد كتير بحبها

بس أرجع وأكرر النصيحة لوجه الله والوطن : بدل فاقد ديوان عظيم جداً لو عايز تقرا شعر بجد