In the Mood for Love

- يعني ينفع كده تفوَّتي عليَّ الماتش

- فدايا فدايا

- يا سلام ياختي

- آه طبعاً

- يعجبني ثقتك والله

- أنا مبسوطة أوي يا محمد

- ما هو وصلني إنك مبسوطة أوي يا محمد ، إن شالله دايماً

- أقولك ولا أتقَل عليك شوية

- ياما جاب الغراب ...

- أنا غراب .. تصدق إنك بايخ ومش قايله لك حاجة

- خلاص معلش قولي

- اعتذر الأول

- أنا آسف يا ستي ، قولي يا بت بقى

- أنا ....

" ميكونش ده اللي اسمه الهوى
اللي ملوش في الكون دوا "

- فعلاً فعلاً ؟

- فعلاً فعلاً :)

- هوَّ .. صح ؟؟

- ( تحرَّك راسها لفوق وتحت ، آه يعني )

- تجيبي لي اسمه الثلاثي وسنه وعنوانه وكل المعلومات عنه وييجي يقابلني اممم .. بكرة بعد الماتش

- :)

- :) ، يخرب بيتك ، بيبقى شكله إيه البتاع ده اللي بيسموه الحب

- بيبقى شكله عامل كده ( تميل بجنبها على اليمين ) مايل على اليمين شوية

- أوبا ، أهو ده عيب الديمقراطية ، ريم أنا في مقام أبوكي دلوقتي فلما أسألك سؤال تردي بأدب

- مش عارفة يا محمد ، بس أنا مبسوطة أوي .. حاسه إن عمري ما كنت مبسوطة زي دلوقتي

" يا هنا اللي بيه قلبه انكوى
ميكونش ده اللي اسمه الهوى "

- عارف كنت دايماً أتخيل اللي هييجي يقولي بحبك ده لازم يقولهالي تحت المطر وبعدين ياخدني بالحضن وأغنية آدم هو وهي حنان بقى وكده

- ما هي الأفلام دي اللي مودياكم في داهية

- بس طلع مش ضروري يعني ، رغم إن كل حاجة كانت بتقولها من بدري بس لما نطقها وشي احمَرّ زي القوطاية وحسيت .. حسيت كإني عايزه الأرض تنشق وتبلعني زي ما بيقولوا بس في نفس الوقت عايزه أفضل موجودة ونفسي أزعَّق وأقوله وأنا كمان ، بس متشوفنيش يا واد وأنا مكسوفة كنت عامله زي البطة البلدي مش قادرة أنطق ( تضحك ) كل اللي عملته بعد التتنيح ده كله إني هزيت دماغي كده وبعدين قلت أنا عايزه أروَّح .. كنت حاسه إن جوايا بيرقص كإني مش أنا

" إيه يا ترى يا هل ترى مالي كده متغيرة
قلبي اتخطف لوني اتقطف معرفش ليه متحيرة "

- وهو ؟؟

- وأنا كنت مركزة .. أنا كنت في البلوى اللي أنا فيها :) بس متهيألي هو كمان كان بايظ

- بس تصدقي فرحت أوي إنه قالهالك في وشك ، كنت خايف يعمل زي الشباب الكيتي كيتي ويقولهالك في ميسدج أو في الماسنجر وكده ، كانت هتبقى بايظة خالص

- آه

- شكلي هحبه الولد ده ، كان ناقص بس يرقعك بوسة على سداغك بس تتعوض

- بوسة ، بالزمة فيه أب يقول كده لبنته

- أب منحل بعيد عنك

" حاسه بهنا خاسة وأنا
لسه في أيام المنى
وردة بنداها صغيَّرة"

- أول ما مشيت كلمتك

- آه وانزل انزل انزل ، فوَّتي عليَّ الماتش

- مش يستاهل ؟؟

- طبعاً وأنا أقدر أقول غير كده

- كنت حاسه إني لازم أناديلك تشيل معايا عشان مش عارفه أشيل لوحدي ، عايزه أحكيلك بسرعة قبل ما أنسى أو يغمن عليَّ :) ، كل الفترة اللي فاتت لما كان يحاول يمسك إيدي أو أي حاجة من دي كنت ببعد

- كنتِ سيبيه يمسكها يا فوزية :)

- :) ، لأ بجد ، كنت ببقى خايفة شوية وقلقانة شوية بس النهاردة كنت حاسه إن أنا اللي عايزه أمسك إيده في وسط الشارع عشان أقول إنه قالهالي وإننا قريبين زيادة أو حتى حاجة واحدة

" أنا شايفه كل الكون فرح "

- عقبالك

- لأ خليني أنا كده قاعد أستَّركُم واحدة ورا التانية ، أنا فدا الشعب

- :) ، بس بزمتك مش جميل ؟

- جميل أوي يا ريم بجد ، وباعتباري أب ديمقراطي زي ما انتِ عارفة فأنا فرحان بيكِ فعلاً ، صحيح مش متفاجئ أوي عشان مركز في الفيلم من أوله وشايف حضرتك كويس طول الفترة اللي فاتت وعارف إن الخطوة دي هتحصل وهتبقى أول مشهد من فيلم تاني أجمل

- يا جامد انتَ

- بس رغم إن المفاجأة مش موجودة بس حاسس إني متفاجئ ومندهش ومبسوط بيكِ وعشانك أوي أكتر من أي حاجة

- ربنا يخليك ليَّ يا محمد بجد

- من يومين كنت ماشي مع أصحابي وبعدين لقينا ولد بيربط لبنت الكوتشي بتاعها ، أنا اعتبرت اللقطة دي أجمل لقطة في يومي ، كنت شايف انتماء بينهم عالي أوي ، ناس من أصحابي شافوا إن ده استهبال وهو كده هزق نفسه وكلام عبيط كده ، بس أنا كنت شايفها لقطة مدهشة لو عملت فيلم رومانسي في يوم من الأيام لازم أحطها فيه .. كان نفسي أروح أقوله إنه جميل عشان عمل كده ومتتكسفش أبداً وإني حسيت إنه بيحبها بجد ، بعد كده لما مشيوا كانت إيدهم مشبكة في إيد بعض .. حسيت إحساسهم وقتها بكل براءته وبساطته جايز أجمل إحساس في الدنيا ، مش عارف ليه حكيتلك الموقف ده دلوقتي .. يمكن عشان الموود اللي إحنا فيه

- مش لازم سبب يا أخي ، كفاية إني حسيت الموقف اللي انتَ قلته أوي ، بس يا محمد ، رغم كل السعادة اللي أنا فيها .. فيه حاجة .. مش عارفة

" أنا خايفة عقلي يكون سرح "

- ريم

- هه

- رحتي فين ؟؟

- موجودة بس فكرت في الحتة القلقانة جوايا

- مش فاهم

- ولا أنا فاهمة بس حسيت بشوية خوف وقلق أو هما كانوا موجودين من الأول

- من إيه ؟

- مش عارفة برضه ، يمكن من التجربة ويمكن من اللي جاي ويمكن خايفة أوي إني انجرح أو أطلع لفوق أوي وانزل على جدور رقبتي

- أنا فاهم إحساسك وشايف كمان إنه شعور طبيعي أوي مع كل تجربة جديدة بنخوضها ، والشعور ده بيزيد كل ما أهمية التجربة نفسها بتزيد ، بس مهم إن ده ميزدش عن حده أو يمنعنا إننا نلمس السما بإدينا

- أيوة بس ...

- مفيهاش بس ، ريم انتِ دلوقتي في سنة رابعة .. وهو كمان ، مهم إن إيدكم تفضل في إيد بعض وانتوا بتبنوا حياتكم ومستقبلكم .. "إيدين بتحضن إيدين تحيي اللي مات من سنين" زي ما قال منير ، وحتى لو محصلش .. مش هتكون نهاية دنيا قد ما هتكون بداية تانية .. بداية جت بعد ما تجربة زي دي بَنِت جوا كل حد فيكم حاجة وفتحت بيبان جوا روحكم

" وسمعت ناس بتقول ده كاس
داير وباب دنيا انفتح "

- بس لو ده حصل أكيد هيجرح

- إحنا ليه بنفكر في الوحش قبل الحلو ، عموماً حتى لو كان فالجرح بيعلم زي ما بقولك دايماً

- ....

- متبوخيش إحساسك بقى .. عيشي فرحتك وجمالها وفكري في مستقبل متلوَّن بالأخضر

- من حقنا نحلم

- أهو كده حضرتك ابتديتي تتعلمي مني
وبعدين لما اتنين بيقولوا إحنا لبعض يا أستاذة ...

- :)

- كملي يا بتاعة شاهين

- مبيقولهاش وهما ناويين يأجلوها لحد ما يعجزوا

- إحنا لبعض ...

- يعني دلوقتي الآن حالاً فوراً

" أعمل حجاب أقرا الكتاب
ألقاه يقول السهم طاب
لازم خلاص قلبي انجرح "

- صح كده ، ممكن دلوقتي أبقى مطَّمَّن عليكِ وأقول إني عرفت أربَّي

- :)

- بس ، امسكي في الابتسامة دي

" وبموكبي حبي انطوى
لازم دهو اللي اسمه الهوى "