31 أغسطس 2007

الشمس ليه بتغيب




إمبارح يا مريم سمعت ماما بتقرا سورة الرحمن
وقفت قريب عشان أسمعها وهي بتقولها
وبعدين اتسحبت ودخلت أوضتي وقفلت عليا
حاولت ألهَّي نفسي في أي حاجة عشان أقنعني إني مش زعلان
وإني كبرت .. وإني مش المفروض أعيَّط
بس غصب عني الدموع نزلت
أنا عارف إني وعدتك مرة إني مش هعيط تاني
وعارف برضه إنك هتسامحيني

قعدت أفتكر لما كُنت بتقري لي سورة الرحمن وتقعدي تشرحي لي معانيها آية آية ، كُنت ببقى فرحان أوي زي أول مرة أخش سينما مثلاً
كان وشك بيبقى مليان نور وصوتك اللي خارج هادي كان بيخليني كده أحس إني عايز أبتسم وعايز أعيط وعايز أخد ربنا بالحضن وأقوله إني بحبه
ولا لما كُنا نقعد نسمع سوا أغنية الأطلال وأفضل أقول إيه الملل ده هي بتعيد كتير ليه .. كانت ماما تقولي بكرة تكبر وتفهم
بس انتِ كُنتِ بتخديني وتفضلي تقولي لي كل جملة معناها إيه
كنت بتجيبي بكرة لحد عندي
عارفة إن من ساعة ممشيتي وأنا معرفتش أسمع الأطلال تاني ؟
آخر مرة كنت بسمعها رحت مديَّر وسائل "هو يعني إيه ..." بس ملقتش حد ورايا
طفيت التلفزيون وحاولت معيطش

انتِ ليه مشيتي يا مريم ؟

كُل ما تحصل حاجة مهمة في حياتي أحاول منسهاش عشان لما تيجي أقعد أحكيهالك
حتى الحاجات الغلط .. بكتبها عشان أبقى أوعدك معملهاش تاني
حاجات كتير عرفتها
كان نفسي تبقي معايا وأقولك إني عرفت
وأغاني كتير سمعتها
كنت هحبها أكتر لو كنا غنيناها سوا
من قريب شفت بنت عنيها حلوة أوي .. صاحبة فاطمة ما انتِ عارفاها
يومها كان نفسي تبقي موجودة عشان أرجع أحكيلك وأقولك على كل حاجة
عنيها كانت شبة عنيكي .. يمكن عشان كده حبيتهم
هو ليه إحنا مبنحسش بالحاجات الحلوة إلا لما متكونش بين إدينا ؟!
أهو أنا محستش إن عنيكي هي أجمل حاجة في الدنيا غير لما مشيتي
يومها كان واحد صاحبي بيسأل بهبل عن أجمل حاجة
قلتله عنين مريم
وبعدين مشيت
رجعت الأوضة
وفضلت أبص لصورتك وأخبي دموعي عليكي
افتكرت لما كنت أقعد في حجرك تلعبي لي في شعري
فهمت إني كنت ببقى فرحان أوي وقتها من غير ما أعرف ليه
ولما كنت أمدلك رجلك عشان تقصي لي ضوافري وأفضل أتزغزغ وأضحك وانتِ تضحكي معايا
بعد ما مشيتي مدتها لماما مرة عشان تقصها لي
من أول مرة ضحكت قالت لي "بلاش مياعة عشان نخلص"
سكت .. ومن يومها اتعلمت أقص ضوافري بنفسي

مش البت أماني بنت عم سيَّد اتجوزت صحيح ؟!
يومها قعدت باصص من الشباك
كُنت هتفرحي لها أكيد
بس قلت هو انتِ كان ممكن تتجوزي وتسيبيني لوحدي ؟!
استهبلت بقى وقلت أكيد لأ مريم متعملش العمايل الوحش دي أبداً . هههه
كانوا مشغلين أغنية "من خمسة لخمسة ونص"
افتكرت لما كنا بنسمعها في أفراح الشارع ونقعد نرقص عليها للصبح
ولا لما يشغلوا أغنية سكرانة
ونفضل نتنطط ونرقص ونتخانق بقى إذا كانت "سترانا" ولا "سكرانة"
وبعدين تقولي لي "في حاجة اسمها سترانا ؟! اسمها سكرانة .. اسمع كلام أختك الكبيرة"
وبعد 500 مرة باين تقعدي تضحكي وتقولي للي بيغني "أبوس إيدك قول حاجة غير سكرانة"

بس تعرفي إن فكرة إنك تتجوزي مش وحشة أوي يعني
أنا بفكر بس على شكلك وانتِ في الكوشة
بس بشرط إنها تبقى لعبة كده نشوفك وانتِ عروسة
وبعدين كل واحد يروَّح بيته
كنت هتبقي حلوة أوي يا مريم

تعرفي
مفيش حد خالص هيفهمني زيك
أنا عارف إني زعلتك كتير
بس فهمت دلوقتي إني كنت بفرح أوي لما كنت آجي أصالحك
أترمي في حضنك وتحضنيني
تبتسمي وساعات متمنعيش شوية دموع وانتِ بتقولي لي "متعملش كده تاني"
بس أرجع واعمل .. وترجعي وتحضنيني
كُنت زي الطفل الصغير اللي بيجري ببقه ناحية صدر أمه عشان يرضع
وانتِ دايماً كنتِ موجود لينا كلنا
حتى ماما
لسه بفتكر شكلها وهي متنرفزة ومضايقة وبتزعق من أي حاجة
وتيجي تخديها بالحضن وتبوسي راسها وتقولي لها "متزعليش نفسك يا ست الكل"
فتبتسم وتقولك "ربنا يخليكي يا بنتي"

انتِ كُنتِ جميلة أوي يا مريم
محستش إني عايز أبداً أقولك بحبك
غير لما بدأت أفهم يعني إيه مش هشوفك تاني
قعدت يومها أعيط وأخبط راسي في المخدة وأقول إزاي مقولتلهاش أبداً إني بحبها
فضلت أحاول أتخيل إنكم بتهزروا وإنك مسافرة شوية عند ربنا بس هترجعي تخديني بالحضن زي زمان
ووقفت قدام المراية أمثل إزاي هبوز في وشك وأقولك إني زعلان عشان اتأخرتي
وإزاي بعدها هفضل نايم في حضنك
وإزاي هحكيلك عن كل حاجة
واحرقلك الأفلام الحلوة اللي شفتها
وأغنيلك الأغاني اللي حبيتها لحد ما تحفظيها ونغنيها سوا
ونفضل نبص للقمر اللي بيطل من شباك أوضتنا
عارفة إني حبيت القمر من ساعة ما مشيتي ؟
كنت أقعد باصص له
شوية أتخيل إنك عليه وبتلعبي وبتغني مع ناس شبهك
وإنك بتشاوري لي من هناك وابتسملك
وساعات أتخيل إن ده بس نورك
وأوقات أقول إن ده انتِ بس ملامحك مش باينة عشان بعيد
ولما يختفي .. أقول إن مع طلعته الجديدة هترجعي وتحضنيني
بس كل ده مش هيحصل
أنا زعلان من ربنا أوي يا مريم .. أوي ، كان وقتها كل يوم يجيني بالليل بعد ما أدخل السرير ويفضل يطبطب عليا
ويقعد جنبي لحد النهار ما يشقشق
كنت بحس بيه وبعمل نفسي نايم
ويبقى نفسي أخده بالحضن واعيَّط بس كنت ببقى زعلان
قلتله إني هصوم وهصلي وهعمل كل حاجة كويسة انتَ عايزها
بس مريم ترجع
مسمعنيش

تفتكري هشوفك امتى تاني ؟؟

انتِ وحشتيني أوي يا مريم

هناك 14 تعليقًا:

غير معرف يقول...

محمد واضح إننا بنشترك في حب حاجت كتير أوي
حتى في حب مريم

البوست جميل أوي
و مريم موجودة بس إنت اللي مش واخد بالك

غير معرف يقول...

لسة حبل الكلام موصول أنا راجع تاني
بس محتاج أركز شوية

:)

غير معرف يقول...

طب خد عنيا و شوفوا بيها هاتلاقوه جوا الجميع هاتلاقيه أجمل و أجمل طول ما حبك له دليل
طبعا إنت عارف ده كلام مين
:)
بص مريم في رأيي بترمز للأمومة و الحنية و الحب الغير مشروط و المطلق
ماما و مريم الرابطة بينهم واضحة لكن هو الأوضح إنك بتفتقد الماما بإحساس مش عارف أقولها كويس دلوقتي بس إحساسك بماما قبل كده غير دلوقت ( ده اللي أنا حاسه من البوست )
عارف يا محمد دايما كرهت النقلات في حياتي لما بتحصل فجأة إنت بتتكلم عن وجود مريم و فجأة عدم وجودها و تغير طعم العالم لعدم وجودها فعلا
بص يا محمد أنا إتكلمت هنا على اللي حسيته من البوست مريم كانت عندي رمز ممكن تكون عندك شخص مش عارف
ـــــــــــــــــــــــــ
بالمناسبة في حاجة إسمها سَتَرانا و عاجباني أكتر من سكرانة
ــــــــــــــــــــــــ
مين السخيف اللي مالي البلد تعليقات ده

و مستنيك تيجي توضحلي مريم أكتر لأني زي ما قلتلك فهمتها رمز

:)

غير معرف يقول...

يمكن أكون مش فاهمة بنسبة مية فى المية
لكن أظن إنى حاسة بنسبة مية فى المية
....
محمد ..أنت إنسان أوى
:)
....
فى كل مرة كنت بتذكر فيها دموعك ..كنت بحس فيها إن دموعى هاتنزل معاها ..تقريبا لإن البوست جه فى وقت مش أوى بالنسبة لى ..
فكانت شوووطة بقى
...
عاجبنى روح البوست ..
و عجبانى روحك فيه
....

غير معرف يقول...

محمد

واضح إن فهمي للموضوع غير اللي إنت عايز تقوله تماما
بس قلت اللي حسيت بيه

محمد المصري يقول...

انتَ ليه افترضت كده يا يحيى ؟
لو ناتج عن إعادة قراءة فده شيء عظيم ، لكن عشان منفتش أو أكدت تحليلك فده مش معناه إنه غلط ، ممكن العكس هو اللي صح إني شفته سليم وعدم تأكيده كان لاتاحة الفرصة لكل حد إنه يقرا الكلام المكتوب بطريقته

عموماً يا صاحبي .. في نقطة مهمة عايز أأكد عليها
أنا مفيش حاجة عايز أقولها أصلاً وبكل معنى الكلمة
أنا نفسي مش فاهم الكلام ده اتكتب ليه وهبقى أحكيلك اتكتب إزاي ..
متهيألي إن الشيء الحقيقي اللي ممكن يوصل من كلام زي ده إحساس أكتر من أي شيء تاني

عملت إيه يا بني في امتحاناتك ؟ مش هنشوفك ؟ :)

محمد المصري يقول...

يمكن أكون مش فاهمة بنسبة مية فى المية
لكن أظن إنى حاسة بنسبة مية فى المية
....

في أكتر من حد كلمني عن البوست ده ، وفي جمل عجبتني كوصف ليه أو وصف لإحساس اللي بيقراه
بس ده فعلاً أفضل وصف سمعته

يمكن لإنه بيوصف إحساسي بالظبط
أنا كمان مش فاهم - بأي نسبة تُذْكَر - وإن كُنت كل مرة أعيد قراية الكلام ده بحسه أكتر كإن حد تاني اللي كاتبه وأنا لسه بحاول أوصل وده شيء مش غريب بالنسبة لظروف كتابة الكلام ده ، كان حد تاني اللي بيكتب فعلاً

^ H@fSS@^ يقول...

معلش بس مضطرة اني انوهلك عن شئ خارج سياق مقالك و اعتذر بشدة مسبقا

فتحت الرابط اللي انت بعت و فيه نقد لرواية اولاد حارتنا و محفوظ ككل
اشكرك و بشدة عليها لكن الظاهر انه فيه مشكلة تقنية
و مش عارفالها سبب
بعد ما طبعتها لقيت الجمل مش متركبة صح و كل اول جملة مطبوع في اخر السطر او حتى في السطر اللي تحته و تعبت و انا اقراها في الاول
يا ترى عندك نسخة تانية مش بي دي اب
ايميلي هو
dorybettyx@yahoo.com

thanks alot

غير معرف يقول...

محمد ممكن تبعتلي الملف اللي بعته لحفصة و أنا هاتصرف فيه

عندي برنامج بيحل مشاكل فروق إصدارات الأوفيس

و أنا هابقى أبعتهولها

محمد المصري يقول...

هو أنا كُنت بعتلها الملف فعلاً قبل ما أشوف ردك

الملف كان الدراسة بتاعة أولاد حارتنا ، كان الحاج رامز الله يكرمه عمله ملف بي دي إف من فترة ونزله على مدونته مع مواضيع تانية ليَ في ظل الحرب الشرسة اللي خرجت فيها اتهامات على نسق "من يقف وراء أماديوس :d

والله وحشني الواد ده

ما علينا
هو الملف كان في الرابط ده :

http://www.divshare.com/download/432878-15a

كُنت هقول ميرسي على اهتمامك بس لقيت إن ده العادي بتاعك فمش هقولها :)

--

حفصة

شكراً ع التنبية طبعاً
وأفتكر إن الملف كده وصل فعلاً

ما أنا عايف طبعا !! يقول...

مش غريبة إن احنا نختار كلام نحسة
بس الغريب هو إن الكلام نفسة يختار كاتبه
.....
أحسنت
.....
تحياتى

عصفور بلا أجنحة يقول...

جيت بس اقول كل سنة وانت طيب

محمد المصري يقول...

رفيق

يـاه ، إزيك ؟
بس حلو الاسم ده ، جبته منين :)

أشكرك بالتأكيد

---

عفصور بلا أجنحة

وانتَ طيَّب يا سيدي
وتنعاد عليك الأيام بخير بإذن الله

mano يقول...

www.goonflash.com

the best flash games on out site