26 أغسطس 2007

مسمعتش يا غايب حدوتة حتتنا !



يا الله !
شوف يا مؤمن الزمن !
البتاع ده فضلت أدوَّر عليه لشهور .. ومش لقيته !
قررت أسجَّلُه لما ييجي الفيلم .. ومن ساعتها الفيلم مجاش !

وفي الآخر ألاقيه بالصدفة !

عموماً أنا مش بنزله بس عشان حاجة كنت بدوَّر عليها من فترة طويلة جداً - أكتر من سنة ونص ! - ولقيلتها ..
أنا بنزله لسببين :

أولهم إني فرحت لما لقيته بشكل أكتر حتى ما أنا كُنت متخيَّل وفضلت أنط مع مُحسن على مُحاكاة عظيمة لاستعراض زي "الرقص تحت المطر" وأنا مُتخيَّل إن روح جين كيلي بترعانا في تلك اللحظة الاستثنائية من تاريخ البشرية !

والتاني إن في تلاتة من اللي بيدخلوا المدونة دي أفتكر إن هيكون عندهم اهتمام بالأغنية والاستعراض ده بشكل كبير وهيفرحوا برضه لما يلاقوه صدفة !

شكراً لليوتوب اللي مظبَّطنا تماماً
وشكراً للأستاذ مرسي اللي رفع الفيديو النادر ده عليه

ولنرقص بسعادة هانئين تحت المطر مع جين كيلي ومحسن محيي الدين


تحت النطرة
حركة خطرة
تحت النطرة
حركة خطرة
ونروح بعيييييد
في ألذ مكــــــان

هناك 12 تعليقًا:

يَحيى المِصري يقول...

إزيك يا إنسان عامل إيه

كنت باحس إن محسن محي الدين من أكتر المناسبين في أفلام أبونا يوسف
بعد نور الشريف بس
باحس إن محسن قاري اللي في دماغ يوسف أو بمعنى أصح يوسف و هو بيفكر في الفيلم
كان حاطط في دماغه التخليل اللي طلعه محسن


ع العموم جوجل فيديو و يوتيوب مظبطيني جدا
جايبلك كام فيديو كده هايعجبوك
الفيديو ده بحبه لأني كنت واقف و هو بيتصور

دوس هنا


أحسن من الأقلام الأمريكاني
:)
التانيين بقى مفاجأة و قمة التظبيط اللي ظبطهولي جوجل فيديو شوف و قوللي رأيك
اللينك الأول


اللينك التاني


سلاماتي يا محمد
:)

محمد المصري يقول...

بخير يا ريَّس ، انتَ اللي إيه أخبارك ؟

بُص .. في مشهد في إسكندرية كمان وكمان بحبه أوي لسبب هقوله بعدين ، كان مشهد لشاهين مع توفيق صالح بيتكلموا عن هاملت ومحسن محيي الدين وعلاقة شاهين بيه ، شاهين - الممثل والمخرج - عمل مشهد عبقري أوي .. مساحة من الصمت وزووم إن على وشه وهو بيقول "محدش فهمني زيه ، لما عمل دوري كنت بتلخبط .. ده أنا ولا هو ، ومتهيألي هو كمان اتلخبط"

في رأيي يا يحيى إن مُحسن هو أكتر حد فهم شاهين على الإطلاق .. وأكتر ممثل شاهين ارتبط بيه وحبه وفي كل فيلم من بعد "اليوم السادس" كان في دور لمحسن بيدور عليه .. وكان هيبقى شيء تاني لو هو موجود ، على سبيل المثال : عمرو عبد الجليل في إسكندرية كمان وكمان .. خالد النبوي في المهاجر والمصير
ويمكن مينفسش محسن في المكانة دي عند شاهين غير محمود المليجي الله يرحمه
وده مش تقليل من باقي الممثلين اللي اشتغلوا معاه وطلعوا أداءات هايلة ، بس حالة التواءم والارتباط الكامل دي مكنتش في رأيي غير مع الاتنين دول ..

--

بخصوص الفيديوهات
خيرك سابق :)

الفيديو الأول ده كان عندي سؤال قد يكون غبياً بس بفكر فيه من وقتها :
هو الراجل صاحب العربية ده .. ادوله تعويض عنها بسهولة ؟ ولا ادوله شوكلاتة وقالوله روح على طنط يا حبيبي دي راحت فدا ماما مصر ؟!

--

نـــاجي العلي :)
يعيش فيديو جوجل في الأرضِ والسماء يا عم :) ، أفتكر فعلاً إني محتاج أشوف الفيلم ده تاني عشان أعرف اللي كتبته من سنة ونص عنه كان مجرد إعجاب عاطفي ولا كان عندي حق فعلاً ..

--

عامل إيه في مذاكرتك ؟
الشدَّة يا بني عايزين نخلص بقى
أنا واثق فيك على فكرة ، متكسفنيش بقى
وخد بالك من نفسك كمان

شقلوطة يقول...

كنت شفت الأغنية دى قريب على التلفزيون
ماأخبيش عليك ..علشان أنا مش متابعة الأفلام القديمة عن خبرة
كنت أول مرة أشوفه ..لكن اللى فاكراه إنى فضلت واقفة ادام الأغنية مش عايزة أقلب ..محسن شاددنى بكل حاجة فيه ..حركاته ..عينيه ..الكلام ..وشه اللى فرحان و بيزعلنى فى نفس الوقت
الأغنية اللى رقصتنى و زعلتنى فى نفس الوقت
الله أعلم لية ..
...
بس بجد شكرا يا محمد ..أنا بموت فى الإنسان ده ..يمكن يكون فتى أحلامى زى ما بيقولوا ..
ولا مابقتش تفرق
:)
.....
ألف شكر لليوتيوب ..و لمرسى و ليك يا فندم

:)

يَحيى المِصري يقول...

عاجبك ال
mental monopoly
اللي إنت إتسببت فيه ده بقالي من ساعة ما شوفت الفيديو و أنا باغني الأغنية و أفكر في محسن محي الدين في الدور ده

فعلا لما بتخيل يوسف و هو صغير على طول باتخيله محسن محي الدين

محمد ياسر يقول...

جميل اوى
و الثنائى محسن و شاهين كان رائع
وما زال شاهين فى روعته

تحياتى

محمد المصري يقول...

مهـا

بُصي هو الفيلم نفسه قيمته مش كبيرة ، اليوم السادس هو أقل أفلام يوسف شاهين خلال عقدين من وجهه نظري ، بس رغم كده فمُحسن عمل فيه حاجات كافية جداً إنك تقعد تتفرَّج عليه كل ما ييجي ، مش بس لأسلوب رقصه الاستثناءي .. ومش بس لتمثيله الممتاز .. ومش بس لملامحه المبهجة دايماً .. السبب الأهم هي الروح اللي بيديها للقرداتي وبتتطغى على الفيلم كله ، وده شيء واضح جزء منه في الاستعراض بتاع حدوتة حتتنا ..
من وجهه نظري .. ده الفيلم الوحيد اللي عمله يوسف شاهين وسمح لحد تاني إنه يقود روح العمل كله ..

بخصوص مُحسن ..
أفتكر إني استخدمت ما يُسمى بالصورة الرمزية تلات مرَّات بس في حياتي ، كان منهم صورة لمُحسن من فيلم اسكندرية ليه ، صحيح كنت بقصد الإحساس اللي خارج منها بصرف النظر عن الشخص ، بس مُحسن قعلاً واحد من أقرب الممثلين ليَّ ..

(مبقتش تفرق !)
ليه كده يا بُنَيَّتي ؟! ، قولي يا رب وخلي أملك في ربَّنا كبير :)

حمد لله ع السلامة يا مها
ينفع طبعاً أقول منوَّرة :)

محمد المصري يقول...

يحيى

وأنا كمان :)
ابن المجنونة ده حببني في حاجات كتير .. من أهمها الرقص
كُنت بفكر أنا وعُمَر عن الكيفية اللي ممكن نعلَّق بيها حبل غسيل في السقف عشان أعرف أعمل اللفة اللي في الاستعرض ده :D
ربنا يُستُر :D

--

بالمناسبة
أنا بحب كاتوزيان جداً
آدي حاجة تانية بينَّا :)
مُمكن أبعت لك الموقع بتاعة لو مش عندك

محمد المصري يقول...

محمد ياسر

أهلاً بحضرتك
خدت واجب الضيافة ولا لسه ؟

"شاهين مازال في روعته"
اممممم
شخصياً كنت اتمنى يتوقف عند نقطة التكريم الأكبر في كان بنهاية سيرة سينمائية زي المصير
من بعدها هو معملش فيلم ممكن نقول عليه جيَّد ، وهي فوضى هيكون استمراراً لمسلسل المباشرة والتهريج والاستسهال اللي انتهجه في سينما ما بعد المصير

أهلاً بيك مرة تانية
نوَّرت

يَحيى المِصري يقول...

آه حبل في الحيطة ربنا يستر فكرتني و أنا مرة و إبن خالتي شفنا مع بعض فيلم فيه واحد بيروض حصان بجناح و قتل وحش بعد كده ( عرفت بعد كده إن الراجل ده بيليروفون و بيروض بيجاسوس و الوحش اللي هو الكايميرا ) المهم خد بالك

ـــــــــــــــــــــ
ده بقى أكتر فيديو بحبه ليوسف شاهين و هو بيغني في فيلم إسكندرية كمان و كمان
http://www.youtube.com/watch?v=lpacMv-sfkk

غير معرف يقول...

غريبه جدا ان حد يعلق علي بوست قديم بس انا لسه شايف الفيلم امبارح ولسه شغال لي في دماغي.
انتول عارفين ان سعاد حسني كانت علي وشك انها تعمل الدور بتاع داليدا... لو شوفتوا الفيلم تاني تخيلوا سعاد بدل داليدا وهاتلاقوا الموضوع كان ممكن يكون مختلف 360 درجه.
واكيد احاسيس الرغبه والكبت وحب السينما لو كانت مابين محسن وسعاد حسني
كانت هاتطلع نتيجه تانيه خالص

mano يقول...

www.goonflash.com

the best flash games on out site

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول