عزيزي أحمد
.
.
.
على ذكر إنّك مش بتحب "بعيد عَنّك"
أنا مش بفهم في المازيكا خالص ، فعلاً يعني
، حتى الوقت الأسبق اللي كُنت مُهتم فيه بالأوبرا والموسيقى الكلاسيكية ، بفكر دلوقتي
إن السبب كان "دراميَّة" المازيكا ، التحوّلات العنيفة اللي فيها ، واللي كانت مُرتبطة بكتاب كان عندي عن قصص الأوبرات ،
فكنت عارف أتواصل مع ده ، ومع الوقت لما بقت موسيقى المَشهد الأخير من "بحيرة
البَجع" هي القِطعة الكلاسيكية المُفضّلة ، ارتبط ده بوشوش العَجائز في نهاية Of Gods and Men
أغاني أم كلثوم المُفضَّلة غالباً مرتبطة
بقيمة الكلام ، مش إنه عظيم ، قد ما بيعبَّر
عن حاجة بعمق ، حتى الأغاني المُفضَّلة اللي كلامها مش قوي ، زي "ليلي ونهاري"
، ففيه عَظَمة درامية برضه في المازيكا بتخلّيها
توصل للمكانة دي ، وصوت أم كلثوم جنب كل حاجة
مثلاً ، بعيد عَنك ، الصبح كان واضح جداً
أنا ليه بحبَّها للدرجة دي ، حاجة ملهاش علاقة بالأغنية - أحياناً - قد ما ليها علاقة
باللي بتسيبه وأنا بسمعها
في الكوبلية الأخير ، الأعظم ، جملتي المُفضلة
في الأغنية وهي بتقول "فين أشكيلك فين ؟ عندي كلام وكلام وحاجات" ، طريقتها
وهي بتقول ده ، ببعض التّوهان كما أتصوّر وأنا بسمع ، زي البني آدمين لما بيسرحوا في
نُص حكاية حزينة ، هي مش عارفة هتحكي إيه ، عندي "كلام وكلام وحاجات" ، وبتكمّل
شعور التوهة ده وهي بتقول "فين دَمعك يا عين ؟ بيريَّحني بُكايا ساعات" ،
بَصَدّق إن العِياط راحة ليها فعلاً ، قِلة حيلة شديدة بحسَّها في صوت وأداء أم كلثوم
، ولما بتكمل - بالتكرار المُفضل في الأغنية - "بخاف عليك وبخاف تنساني"
، عارف الحالة دي ؟ إنك تخاف من إن حد كان قريّب ينساك أو متبقاش بالنسبة له حاجة مُهِمّة كما كُنت ؟ ، و"الشُّوق
إليك على طول صَحَّاني ، وغَلبني الشّوق وغَلّبني"
بقيت بضَّايق مؤخراً من جملة "أغاني
أم كلثوم شبة بعض" ، أو إنها بتدور في موضوع واحد عن الحُب والهَجر ، عشان المشاعر
الإنسانية مُعَقَّدة ، وعشان فُراق الحَبيب في "لسه فاكِر" غير في
"بعيد عَنّك" غير في "الأطلال" ، ومَحَبّته في "حيَّرت قلبي"
غير "عوّدت عيني" ، انتظار اللُّقا في "أغداً ألقاك" مش زي
"رَق الحبيب" والاتنين غير "دارت الأيّام" أو "أقبل اللّيل"
وما يتبقى من الأغنية ، إحساس أم كلثوم وهي
بتقولها ، أهم أحياناً من الكلام واللّحن وأي حاجة تانية
فيعني ، لهذا أُحب بعيد عَنّك لتلك الدرجة
.
.
.
محمد
القاهرة / أبريل 2012
هناك تعليق واحد:
صباح الورد
:)
يا مزاجك العـــالي
إرسال تعليق