14 يناير 2008

خواطر في ذكرى ميلاد عبد الناصر

"لست واحدا من دراويش الناصرية ولم أكن في اي يوم من الأيام. فكما أومن بأن منجزات عبد الناصر كانت عظيمة أدرك أيضا أن أخطاءه كانت كذلك. لكنها لم تكن أخطاء ناجمة عن نقص في الوطنية، أملته مطامح أو مطامع أو عقد شخصية ونفسية، وإنما عن قصور في الحسابات، من ناحية، وعن خلل في بنية النظام، من ناحية أخري، أظن أن عبد الناصر انتبه إليهما بعد النكسة وعقد العزم والنية علي مواجهتهما وتصحيحهما، غير أن القدر لم يسعفه. وفي تقديري أن مكانة عبد الناصر في تاريخ مصر والعرب والعالم ستظل محفوظة لسببين، علي الأقل :

الأول: أنه انتبه إلي أهمية المسألة الاجتماعية ليس بوصفها مطلبا تمليه ضرورات العدل والإنصاف فقط، وإنما باعتبارها أيضا حاجة ملحة تفرضها ضرورات التنمية والتحديث، لأنه لا يمكن لشعب أن ينهض ويبني دولة قوية إذا كانت أغلبيته الساحقة مسحوقة ومهمشة
والثاني: أنه انتبه إلي حقيقة الارتباط العضوي بين أمن مصر الوطني والقومي واستحالة الفصل بين ما هو وطني وما هو قومي، ومن هنا تدخل معركته السد العالي، وهي معركة مصرية بحت، مع معاركه في مواجهة الاستعمار والأحلاف وإسرائيل، وهي معارك قومية وإنسانية مشتركة"

د. حسن نافعة
في مقاله الأسبوعي - جريدة المصري اليوم

---

كان عارف المجد لا الأحجار ولا التماثيل
هيّ اللي تبنيه لكن راحة التراحيل
وعارف القمح أكبر معجزات النيل
وفي كل مطرح من العالم وكل صباح
طعم الرغيف مصري وأصول العرق فلاح

فؤاد حدَّاد
قصيدة "مصر وجمال"
ديوان "استشهاد جمال عبد الناصر"

هناك 30 تعليقًا:

عباس العبد يقول...

تصدق يا ولد يا محمد
انا عندى مشكلة و ازمة كبيرة
البوست الاخير بتاعى هو الى لعبلى فى دماغى
الطبقة الى انا بتكلم عليها دى و هى كانت الاكثرية فى عهد عبد الناصر
الوحيد الى كان بيدافع عنها و بيحترمها و بيقف فى صفها هو
هو الى كان مخليها مستقرة
تعليم علاج شغل كل حاجة
و الحكاية دى انعكست على الدولة فبقت
الدولة كلها تتعامل مع الطبقة دى بكامل احترامها
و هو ده الى ممكن يفسرلنا ليه خرجه وراه فى وفاته بالاعداد الكبيرة دى و هم بيعطوا بس مش عليه على نفسهم لأنهم و بالمصطلح المباشر حيتيتموا من بعده
السادات حفر حفرة ورماهم فيها و الباشا الحالى ردم عليهم
مش برضه ؟
بس المشكلة مش فى كده
الوضع ده انا ابتديت اقدره و احس بيه
و خايف احب البنى ادم الى اسمه عبد الناصر
بس مش دى المشكلة
المشكلة فى ايه ؟
انه خزوق الشعب بأكمله و مات
تتحل دى ازاى ؟
مش عارف برضه
مركز معايا انت و لا ايه ؟
....
شفت يا عم
واحد دخل يكفرنى فى المدونة
واخد بالك

مصطفى اسماعيل يقول...

على رأى رامز
ضحك علينا ومات

ماستناش لما اتولد واحضنه
مستناش اقوله بحبك
ماستناش لما اعمل مظاهرة اعارض فيها حاجات ليه
ماستناش لما يقبض عليا مع تنظيم شيوعى ولا حاجة

سبنى ومشى بدرى

محمد المصري يقول...

ده تعليق لنسرين على كلام رامز حطته في موضوع الجولدن جلوب ، بنقله هنا عشان لو رامز عايز يقول حاجة .. وعشان أنا شخصياً عايز أقول حاجة ::

Nsreen Bsunee said...
بعد اذنك يا محمد حارد على تعليق رامز اللى كان بخصوص عبد الناصر

رامز
واضح ان حكايه ولاد الكلب شغلاك ودى حاجه كويسه

رامز عبدالناصر محققش للطبقه دى حاجه واللى هما فيه دلوقتى هو الزرع اللى نبت من تربه عبدالناصر الملوثه
عبدالناصر ياعزيزى من باب انه يحط الشعب تحت باطه وبما ان الطبقه دى كانت الاغلبيه هو مشي بنظام الدعم اللى هو اوسخ نظام عرفته البشريه ولاننا شعب هتيف بطبيعته وودننا بتحب الخطب الرنانه وبنصدق فا احنا اتزرفنا على وشنا زرفه وحشه اوى بندفع كلنا تمنها دلوقتى
عبدالناصر دعم المواد الاساسيه عشان تنزل السوق بسعر قليل ويراضى الناس ويفرحهم وهىىىىى تسقيفه يا معلم بس ده مكانش من جيب اهله ده كان من مرتبات الناس عادى جدا كان بيدى مرتبات ضعيفه ويدعم المنتجات الاساسيه وخلاص ماخترعش الذره يعنى وكل الناس استفادت الغلبان اللى بياخد مرتب ضعيف والحرامى ورجل الاعمال وعصابات الثوره والجيش كله استفاد
ولاد الكلب الحكومه تستقطع من مرتباتهم وكله يستفاد والناس تفرح ويبقى عبدالناصر معبود الجماهير

رامز انا عارفه انك عارف الكلام ده كله وزياده ومش محتاج انى ااقولهولك بس حبيت اقولك ان تاريخ عبدالناصر كله وكل حركاته كانت للسيطره على رجل الشارع فقط مكانتش من باب الاهتمام بمصالح ولاد الكلب ولا ولاد الناس حتى وهو نجح فى كده للاسف وادينا بنجنى الزرع اللى زرعه عبدالناصر وعصابته

تحياتى

محمد المصري يقول...

رامز

استمر يا ريَّس في النزول لمستنقع الغواية

اللي انتَ وصلتله ده أنا متوقع توصله من زمان ، ممكن نتكلم كتير في التنظير والحريات السياسية المفقودة في وقت عبد الناصر بس مهم كل واحد فينا يسأل نفسه ليه الناس حبته وكانت حواليه بالشكل ده

عارف إنك ملكش في الشعر أوي
بس لو في يوم من الأيام وقع في إيدك ديوان فؤاد حداد اللي أنا ناقل منه الأبيات دي هاته واقراه ، يمكن عشان أنا شخصياً محستش عبد الناصر بالخصوصية دي غير لما قريت شعر فؤاد حداد .. حاجة كده بريحة الناس بعيداً عن أي تنظير سياسي

--

الناس اللي خرجت وراه خرجت لإنه كان كريم معاها فعلاً "در الشهامة اللي أكتر منها حنية" زي ما قال فؤاد حداد

عشان كده أنا مش معاك إنهم خرجوا يبكوا مستقبلهم - وطبعاً أنا فاهم قصدك - بس حابب أوضح إن ده مش صحيح مع خليفة له ذكر منذ اللحظة الأولى أنه سيسير على خطى جمال عبد الناصر وأن كلنا جمال عبد الناصر ، إلى آخر الهجص ده

الناس طلعت تبكي جمال .. وجمال بس

عارف الفرق فين ؟؟

لو كنت بتقرا مقالات هيكل اللي بتتنشر دلوقتي في المصري اليوم - طالما امتلكت من الصبر وقوة الشكيمة إنك تقرا 32 صفحة لعبد الله كمال أكيد هتقرا صفحتين هيكل .. خصوصاً إنك منزلهم عندك - ، فيه حوار مهم نقل منه جملة على لسان السادات ، كان بيقول :
"الفلاحون في حالهم والعمال لا يحركهم إلا الشيوعيون والرأسمالية الوطنية سعيدة بالانفتاح .المشكلة كلها فيمن تسمونهم بالمثقفين . هؤلاء الأفندية الذين لا عمل لهم إلا إثارة المشاكل"
ثم يُمكل :
"لكن هؤلاء جميعاً "ياخيبتهم التقيلة" نسوا القوة الخمسة فيمن يسمونهم تحالف قوى الشعب ، نسوا الجيش ، فليتفضل هؤلاء جميعاً ليواجهوا القوة الخمسة وسوف نرى النتيجة"

السادات - ومبارك كذلك - اتعاملوا مع الشعب باعتبار إنه يجب ترويضه .. يظهر ذلك في تعاملهم مثلاً مع غلاء الأسعار باعتباره المثال الأوضح - والأكثر ظهوراً في الفترة الحالية - على طريقة : اطبخي يا جارية ، وإن قرش زيادة مش هيضر وجنية فرق في السعر مش هيخرب مالطة .. مع إن الحقيقة غير كده طبعاً

عبد الناصر .. رغم أي عيوب لمرحلة أو أي تحفظات على عهد ، كان حاسس فعلاً بنبض الناس

--

بخصوص اللي بيكفرك
يا عم انتَ المفروض تكون اتعودت بقى !
يا رامز ده انتَ أكتر مدون بشوفه بيتكفر أو بيتهم إن ليه ميول إلحادية
وبعدين مكنتش أعرف إنك تقصد الصارم الحاسم ، ده كل بوست يطلب لعمرو عزت الهداية .. أقل واجب إنه يكفرك يعني :)

بس بشكل جد
الراجل مكفركش يا عم ، هو كان قصده تبطل زندقة وفيديوهات سكس من اللي انتَ بتنزلها عشان متفسدش أخلاق الشباب مزعزع العقيدة اللي زي حالاتي .. وانتَ بدورك رديت عليه وقلتله إن دي محاولة للمتابعة والتنظير لمدى الانحدار الذي وصلنا إليه
حوار أيديولوجي هادئ اختلاف المنطلقات فيه لا يعني فساد الود والوصول لمرحلة التكفير

بس هو مين اللي قال إنك مش كافر ؟

:)

محمد المصري يقول...

مصطفى

عجزتوا بدري ليه يا عيال
ومشيت بسرعة ليه يا جمال
نده القمر عبد الناصر

محمد المصري يقول...

نسرين

التعليق موجه لرامز لكن أعتقد أنه لا مانع من دخولي على الخط

هناك الكثير يمكن أن يقال رداً على كل جزء من تعليقك .. حديثٌ عن معدلات التنمية الأكبر وقتها على كل بلدان العالم الثالث .. عن متوسط دخل الفرد وازدياده المستمر خلال عهد عبد الناصر .. عن المشروعات الكبرى التي شكلت أساس مرحلة .. إلخ

إلا أن النقطة الأهم التي أثارتني في تعليقك هي الحد الفاصل بين الفعل والنية بالنسبة لرئيس دولة ، هل من الممكن أن نتعامل مع الأمر كذلك بالفعل ؟؟

الأمر ليس دخولاً في النيات يا نسرين .. والتاريخ يعامل كوقائع وليس ( كخواطر ترد في أذهان صانعيه ) ، لذلك فلا معنى لاعتبار منجزات عبد الناصر بالنسبة لطبقة تشكل أغلبية شعب كامل لمجرد أنه "يريد الشعب تحت باطه" !

أما الأغرب بالفعل فهو معلومات جاءت في سياق تعليقك تعارض أبسط المعلومات التاريخية الموثقة الخاصة بتلك الفترة والتي لا يستطيع إنكارها حتى كارهي عبد الناصر :

من قال أن عبد الناصر "كان بيدي الشعب مرتبات قليلة" ؟؟
ومن قال أن جوهر السياسات الاقتصادية في عهد عبد الناصر تختصر فقط في كونه "بينزل المنتجات بسعر قليل عشان الناس تتبسط" ؟؟

عوضاً حتى عن بديهية أن قيام أي نظام في دول العالم الثالث بدعم المنتجات الأساسية هو شيء جيَّد ومن حق الناس بالفعل ، طالما أن أموال الدعم منهم أولاً وأخيراً

لكن الأهم من ذلك هو الاحصائيات الاقتصادية الخاصة بالعهد الناصري

يا نسرين .. معدل دخل الفرد في مصر فيما بعد الثورة كان في ازدياد مستمر .. ليصل عام 59 إلى خمسين جنية عن عام 52 وقت قيام الثورة حيث كان متوسط دخل الفرد 36 جنيهاً .. تلك الزيادة تستمر حتى تصل عام 65 لـ 60 جنية للفرد ..

يا نسرين .. تبعاً لأرقام البنك الدولي في تلك الفترة - وكما تعلمين هو معادي لسياسات عبد الناصر بالتأكيد لذلك لن يجامله - فإن مصر كانت تحقق أعلى معدلات تنمية في العالم الثالث كله .. تنمية تجري بمتوسط 7.6% سنوياً من 56 إلى 66 بل أنها وصلت لمعدل سنوي وصل إلى 10% خلال النصف الأول من الستينات ، وحتى بعد عام 67 .. استمر هذا النمو بمعدل 4% وازداد بعد ذلك ليصل عام 69 لـ 6%
رغم أننا نتحدث عن فترة بها ثلاث حروب كبرى ومواجهات مستمرة مع الغرب من أجل الحصول على حقوق لنا ، وتوجيه الكثير من أموال الدولة للدعم العسكري خصوصاً في مرحلة ما بعد نكسة 67

مصر امتلكت في هذا الوقت قاعدة تصنيعية إنتاجية هائلة هي الأكبر في العالم الثالث

معدل التنمية المستمرة هذا خلال سنوات 1952 إلى 1973 - قبل انقلاب السادات على سياسات عبد الناصر الاقتصادية - وصل لمعدل غير مسبوق في تاريخ مصر .. ولا ملحوق بالطبع حيث بعد ذلك وصل النمو السنوي معدلات تحت الصفر !

نسرين
سأتفق معكِ إلى حدًّ بعيد عند وصم عبد الناصر بالديكتاتورية أو وصف المعتقلات والتعذيب في عهده .. بل واعتبار العهد بكامله استمرار لتاريخ طويل من نظرية الحاكم الإله والشعب غير المتدخل في سلطته ، سأتفق معكِ حتى لو اختلفنا بعد ذلك في الأسباب والنتائج التي بنيت على ذلك
ولكن عند الحديث عن الشعب .. والجانب الاقتصادي الخاص بمصر من معدلات تنمية ومتوسط دخل الفرد ومشروعات صناعية كبرى .. سنختلف تماماً بالتأكيد لأن كلامك لا يملك أي صحة من الناحية التاريخية

--

زهقت من الكلام بالفصحى وممكن نتكلم دلوقتي بالعامية

أكتر حاجة ضايقتني في ردك مكنتش تخص عبد الناصر ، كانت تخص الناس

محبش بس يا نسرين إن حد بحترمه جداً جداً زيك يوصف الشعب بإنه هتيفة وأغبيا ممكن تضحك عليهم بكلمتين ، إحنا أحسن وأذكى من كده بكتير .. ومش ممكن اختصار ملايين وملايين مشيوا في جنازة الراجل الرسمية - أو عشرات الجنائز الرمزية - على امتداد الدول العربية باعتبار إن الموضوع كله مرتبط بالخطب الرنانة
مستحيل تضحك على شعب كامل أكتر من 18 سنة لمجرد خطبك ، لإن ببساطة سياساتك هتكشفك .. والناس دي لو مكنتش مرتاحة في وقته - المعنى البسيط للراحة في نظري هو أكل وشرب ومسكن وعلاج وتعليم وحياة كريمة في أبسط أحوالها - مكنتش هتمشي وراه بالشكل ده ..
وبعدين تعالي هنا .. هو لو الموضوع كده .. ليه فيه ملايين لسه فاكرينه بعد تمانية وتلاتين سنة من وفاته ؟؟ وليه واحد زي هوجو شافيز يصف سياسته بالسياسة الناصرية ؟؟ وليه واحد زيي مشفش عبد الناصر ولا عاش عهده ولا سمع خطبه الرنانة بيكتب بوست زي اللي فوق ويرد عليكي بكومنت طويل زي ده ؟؟

صدقيني يا بنتي أكيد السبب أبعد بكتير من كده ،سبب هتوصليله في يوم من الأيام - زي رامز كده :) - حتى لو موفقتهوش أو مجاش على هواكي ..

--

أخبارك إيه بقى ؟
لسه بتتخانقي عند سلطة ولا خلصتي ؟ :)

تحياتي لحضرتك يا آنسة :)

Hypatia يقول...

محمد
يخرب بيتك
ده انت غسلتنى
هههههههههههههههه
هههههههههههههههههههه
هههههههههههههههههههه
هههههههههههههههههههه
هههههههههههههههه

محمد المصري يقول...

:D

وحياة ربنا انتِ بنت زي العسل

ما عاش ولا كان اللي يغسلك يا آنسة

اممم .. ممكن نكون ولاد ناس ونسميها هزيمة دبلوماسية :D

القطي دي :
(F)

Hypatia يقول...

عزيزى محمد
تعليقك عجبنى عجبنى غسلتنى يا محمد ونشرتنى
بس بجد تعليقك دخل نافوخى واوعدك فى القريب العاجل حاكتب بوست بعنوان لماذا لا احبك بكباشي عبد الناصر؟
ايه رايك


:)

الاحترام متبادل جدا جدا يا اخى الكبير او الصغير مش عارفه بس اظن الكبير

براحه شويه عليه انا مش قدك
لكن احنا شعب هتيف يا محمد ويتضحك علينا فعلا وانا مقولتش غباء على فكره انا بالتحديد اقدر اجزم واقولك اننا اذكى شعب على مستوى المنطقه العربيه

لكن احنا هتيفه يا محمد وموجه تشيلنا وموجه تحطنا وملناش موقف ثابت للاسف ودى مشكلتنا

تحياتى
:)

Hypatia يقول...

ايه ده يا اخواتى التعليقات دى بتطلع منين بسم الله الرحمن الرحيم

انت قاعد معايا فى المدونه

انت متعرفش انه ما اجتمع رجل وانسه فى مدونه الا وكان بينهما رامز الشرقاوى
قصدى الشيطان

:)

Hypatia يقول...

بلاش انسه دى انا اصغر منك يا كابتن

:)

محمد المصري يقول...

أعتقد إنك كتبتي ردك وأنا بكتب الكومنت اللي فات

انتِ حد من أكتر الناس اللي ناقشتهم وحسيت إن الكلام اللي بقوله بيوصل لعقولهم فعلاً ، وإنهم بيملكوا قناعات اتجاه الأمور بس لما بيدخلوا في مناقشة مبيعتبروهاش حقائق مسلم بيها وبيكون عندهم استعداد يغيروها في حال تم اثبات خطأها .. وده نوع من الناس نادر جداً .. ومحترم جداً

ربنا يديم عليكي التصالح الجميل مع النفس ده

بس برضه ما عاش ولا كان اللي يغسل حضرتك :)

---

هستنى يا ستي البوست بتاعك عن عبد الناصر .. الهمَّة بقى

---

ليه بلاش آنسة ؟
صحيح انتِ في مقام بُنيَّاتي .. بس مفيش مانع يعني
ما حد يقولها حاجة يا جدعان :)
عموماً يا نسرين "آنسة" دي مميزة عشان بتخلي الواحد يبني آماله العريضة ويبدأ يكوَّن نفسه بقى :)

---

إحنا مش شعب هتيف يا نسرين
إحنا شعب محتاجين فرصة نكون أحسن .. محتاجين إيد تطبطب على كتافنا .. شعب محتاج يفرح وما بيصدق يلاقي حاجة تفرحه .. بنحب اللي يتكلم بلسانا ويحترمنا ويوفر لنا حياة كريمة

ممكن يضحك علينا شوية .. بس في النهاية بنكون هارشين التيتة كلها وكلمة مصر اللي بتبقى هي ( إحنا ) مش حد تاني

---

مرة تانية ربنا يديم عليكي التصالح مع النفس ده
مش ناوية تنزلي مصر قريب ؟؟

تحياتي يا قمر

غير معرف يقول...

إيه ده أنا كنت هنا النهاردة الصبح و كان فيه تعليق واحد بس ربنا يزيد و يبارك

بص يا محمد و يا نسرين حاولت أدور كتير على سبب ليه أنا قريب لعبد الناصر حقيقي مش لاقي بس فعلا هو قريب مني

و يا نسرين أنا معظم الكلام اللي كنت هاقوله موجود في كلام محمد بس أحب أضيف إن بس في فترة حكم عبد الناصر و محمد علي مصر كان ليها مشروع تنموي يمكن ماتحقش منه كتير لكن كان في

مصطفى اسماعيل يقول...

انا جيت يانسرين
وانتى عارفة ماحبيكيش تتكلمى مع شباب لوحيدكم
انا وحش
انا حمش
ها ها ها


:)

حتى وانا كنت متوقع لمعظم سياسات عبدالناصر حتى الاقتصادية الازمة القادمة لا محالة
سواء فى المستقبل القريب او البعيد
بس لو كنت موجود كنت هايده وهأيدها

حبى لعبدالناصر واللى ابتديت الاحظه من قريب هو حب لانسان
انسان ماكنش بيكدب لما حب يعمل حاجة
اختلف معاه فى الحاجة اللى عملها
لكن فعلا هو حد مصدق اووى الحق والخير
حد بيحب مصر وبيحب البنى ادمين

عباس العبد يقول...

نسرين
انا كنت حكتب اعلق على موضوع النمو الاقتصادى ده
بس محمد سبقنى
و ده مطلب شرعى لأى شعب
اقرى فى مقالات هيكل الاخيرة
رغم ان الدولة كانت بتمر بحروب و مع ذلك متماسكة اقتصاديا و قادرة على الانتاج
....
بالنوسبة للى عايشين فى ريح عبد الناصر حتى الان فدول مخهم ضارب لأسباب كتيرة
تحبه ماشى
راجل له تاريخ يحسبله ماشى
انما لسه اقعد اهتف بأسمه
فديه رجعية و سلفية اكتر من السلفية الدينية
الاتنين بيوقفوا حركة التاريخ و التقدم
هى ناقصاهم

^ H@fSS@^ يقول...

اولا
احب اقول يسلم فمك يا استاذ نفيسة
اللي هي طبعا نسرين
و كان نفسي ازود لكن الصراحة انا مش في المود نهائيا
بص نصيحة يا نسرين
عشان تبقي عارفة
انا مش بقلك متكتبيش بس بديك خلاصة تجربتي يعني و انت زي اختي الصغنترة
لو كتبتي عن ناصر و ليه بتكريه فتوقعي ما لن تتوقعيه في حياتك من قلة ادب و سفالة و اخلاق واطية من اسافل المدونيين
انتي هنا بتتعاملي مع ناس محترمة و فاكره الكل كده لكن دي ناس بتتناقش معاكي كلمة بكلمة مش زي الواطيين اللي ربنا بلاني بيهم
اديني وعيتك فكوني مستعدة راجعي مدونتي في شهور تسعة و عشرة و حداشر و يمكن اتناشر
كانت حرب البسوس و داحس و الغبراء
و اخيرا احب اقولكم يا اولادي ان الطبقة الوسطى اللي كانت عايشة في زمن عبدالناصر مشفاتش خير بتاتا و امي ما زالت فاكرة كلام امها و خالتها الله يرحمهم عن العز و الخير اللي كانوا عايشين فيه و ماتوا من غير ما يشوفوه و ماتوا متحسرين على ايام العز و الرخص و الجودة و العيشة الكريمة اللي كان ناس كتير عايشين فيها
ناصر ضرب ام الاقتصاد المصري في ام صميمه و خلاه ينهار بلا ام رجعة
شكرا
تحياتي

^ H@fSS@^ يقول...

صحيح عشان مكنوش خرمت اوي عن اصل الموضوع
كل سنة و هو طيب البعيد اللي في بالي

عاش عاش من علمنا الكرامة
تحياتي كمان مزة

sandrill يقول...

Just a request

If you should write about Nasser again please block the comments

^ H@fSS@^ يقول...

hi sandrill, can i know why should mohammed block the comments?
really i want to know.
salam

Hypatia يقول...

محمد
انا مثلا بحب السادات لكن عارفه ان فى حاجات ومساوئ فيه وفى عصره من حق اى حد ميحبهوش عشانها
عادى يعنى
وكذلك ناصر زى ما انا ليا اسباب خلتنى محبهوش اكيد فى حاجات فيه خلت كل الناس دى تحبه
عادى برضه
ودايما لما الواحد يتناقش مع حد بيحبه وبيحترمه مش بيكون فيه مشكله او ازمه انى اعترف بذكاءه او شطارته
ويا سيدى انا باقول انك غسلتنى عشان دى الحقيقه عادى يعنى احنا بقينا صحاب نغسل ونكوى فى بعض مادام كله بحب واحترام





انا البوست الجاى عندى حيكون بخصوص الموضوع ده



مممممممممممممم
بلاش انسه برضه خللى البساط احمدى


ايون انت برضه وصلت لنفس الفكره الى انا باحكى فيها
احنا شعب عاوز يفرح
عاوز حد يطبطب
وبالتالى فا احنا شعب طيب وغلبان
وبنصدق مش عشان احنا اغبيا لا عشان احنا عاوزين نصدق
عشان نفرح
واحنا هتيفه هتيفه يا محمد وانت عارف كده بس مش عاوز تقولها صريحه
وبنطلع نطلع وننزل على مفييييش
وبننسي برضه عشان مش بنحب نزعل كتير


ربنا يديم علينا كلنا التصالح مع النفس ان شاء الله

Hypatia يقول...

يحيي

ولا عمرك حتلاقى سبب


:)

lol

Hypatia يقول...

مصطفى يا سبعى

:)

حاسه باللى انت بتقوله اوى لان انا شخصيا فى لحظه ما فى المشهد العبقرى لجو والشوارع فاضيه وناصر بيقول الخطاب وبهيه بتسمعه بكل حته فى جسمها وروحها والناس بتصرخ وبتجرى وبتقول حنحارب حسيت انى عاوزه اكون معاهم
حسيت انى لو معاهم كنت حاحبه برضه
بس رجعت كرهته برضه عشان المشهد ده عشان هو مكانش يستاهل كل الحب ده وميستاهلش رعشه قلبى وانا باتفرج على المشهد عشان هو معملش حاجه غير الخراب ومعملش حاجه غير انه خدع كل الناس دى
حاسه بيك عشان احنا وصلنا لمرحله اننا عاوزين حد يلمنا حواليه حتى لو كان بيكدب او بيخادع


واظن ان ده السبب الى يحيي مش قادر يعرفه

ممكن يا يحيي ولا فيه سبب تانى

Hypatia يقول...

رامز
انت جبت من الاخر
مخهم ضارب
ومعندهمش جديد
ورجعيتهم هما وغيرهم هى اللى بتشدنا لتحت

Hypatia يقول...

صفصف

طبعا مش محتاجه اقول اننا متفقين

وعادى انا متوقعه اى حاجه لو اتكلمت على ناصر بس عادى ميهمنيش كفايه ان حيكون فيه نقاش محترم حتى لو كان الاغلبيه حتكون غير محترمه فا انا اعرف ارد كويس متقلقيش عليا

وحاروح اشوف التدوينات القديمه بتاعتك منكم نستفيد يا قمر

وعاش عاش
:)

المهم انتى عامله ايه

Hypatia يقول...

مش ملاحظ يا محمد انى عماله ارد واخده راحتى اوى كان البيت بيت ابويا

معلش بقى

واشكرك على حسن الضيافه

:)

sandrill يقول...

Hafssa

saba7 elfol :)) .. hope you are fine .. write in arabic wennaby .. i write in english because i don,t have an arabic keyboard only

Since more than 20 years ago there have been nothing new discussed about Nasser .. if you hate him you can know certainly what the one who loves him will say .. and if you love him also you can know certainly what the one who hates him will say .. so any discussion about him is nothing but recycling .. so even if the discussion is completely freindly & calm ( just like the case here ) it will have nothing to do with the faith in the minds of both sides

The problem with me is that nasser is something very emotional to me so I get bothered every time i hear or read any thing bad about him .. i know this could be very silly for many - and may be for you - but that is what i'm

i can understand your point of view and i can go with you to the end in a fair discussion about Nasser .. but believe me .. the discussion will only be a copy of another one took place between two good friends just 25 years ago .. nothing new but me getting bothered

as about my request to mohammed .. it is just a favour .. he can do or not

^ H@fSS@^ يقول...

سندريل
صباحك ياسمين
بص يا سيدي
كلامك انه مهما اتكلمنا عن ناصر بعيوبه او مساوءه مش حيغير شئ فده صح لكن ده لا يعني ان احنا نوقف نقاش
لانه خد بالك ان احنا هنا مش بنتكلم بصيغة انا صح و انت غلط او العكس و لازم غصب عنك اقنعك بوجهة نظري
احنا هنا بنعنبر عن مشاعيرنا و طبعا انا بتضايق( هو الصراحة بيحصلي ما هو اكتر) لما بلاقي ناس بتنسب له حاجات هو معملهاش و طبيعي ددا ددا بتضايق لما الاقي ناس بتتهم السادات بحاجات هو برضو معملهاش
و اذا كنت انت عاطفي فصدقني انا قلبي ابو العاطفية الله يخرب بيتها اللي مودياني لورا
بالعكس يا صديكي خلينا نتعلم نحاور بعض و احنا مقتنعين باختلافنا و مقتنعين ان محدش فينا بيحاول يكسب الاخر لمخيمه

لعل و عسى الحمير التانية تتعلم مننا كيفية الحوار المتمدن المحترم بغض النظر مين حيقتنع بايه
فاهمني

مصطفى ضنايا
بعد ما قريت تعليقك و بما اني امك فحقولك
ياللخيانة انا حرمتك من الميراث و كل كتبي حتروح لعبس
مش كنت بتقلي انك مش بتحبه
بس يلا عادي تغير الافكار صحي و كويس


نسرين لوهلة شكيت اني اكون دخلت مدونتك و اتلخبطت شوية و شكيت في قوايا العقلية


محمد اسفه اني شغالة هرتلة و استوليت على اخر جزء فاضل في التدوينة دي بعد نسرين

تحياتشي للجميع

مصطفى اسماعيل يقول...

نسرين

عبدالناصر مش كداب
الناس مش عبيطة للدرجة دى
الناس مش هتصدق الا لو انت صادق فعلا
حتى الشعب المصرى اللى على نياتها
هتلاقى محاولات حكام كتير انها تكسب ثقته
وتضحك عليه
بس مكانة عبدالناصر اعلى بكتير
لان عبدالناصر ماكنش بيضحك عليهم
وكانوا عارفين ده


صفصف

انا ممكن وانا قاعد على قهوة فى وسط البلد حاطط رجل على رجل
انفخ دخان سوجارتى واقول
عبدالناصر حمار
ماكنش لازم يعمل ده
ولا ده
ايه الغباء اللى هو فيها

لكن حتى فى اللحظة دى ماينفعش اقول غير انى بحبه
ومش حب تأثير بافلام زى مانسرين بتقول
هو حب تأثير بشخص
شخص صادق
حاول يعمل
ولو حتى ماقدمليش اللى انا محتاجله
لكن هو حاول يقدملى
اللى شاف انى محتاجله
وده سبب كفاية انى احبه

............

ويديك طولة العمر واسرق منك المكتبة فى حياتك يارب
:)

غير معرف يقول...

أنا مش داخلة أعلق على البوست بصراحة
داخلة أقولك ..
إزيك ؟
:)

محمد المصري يقول...

ولا أنا بصراحة داخل أعلَّق على البوست عشان نقطة المناقشة الأساسية اللي اتخذتها التعليقات - وضع الطبقة المتوسطة في عصر عبد الناصر - اتكلمت عنها فعلاً في ردودي اللي فاتت

أنا داخل أقول الحمد لله ، أنا كويس جداً بقالي كام يوم

انتِ ازيَّك ؟؟