25 أبريل 2007

أشهد بإنَّك يا ابن آدم جميل

النَّاس النَّاس .. فتافيت الماس
النَّاس النَّاس .. روحنا في النَّاس

من فترة طويلة جداً كنت قرَّرت إن أول بوست هكتبه في مدونتي يكون عن الناس ، كده من غير ظرف ولا مناسبة .. بوست بس عن الناس ..

النَّاس الحقيقيين زي ما أنا وانتَ عايزين نشوفهم ، عن حاجات لسَّه منوَّرة جوَّاهم مش بنشوفها وسط العاتمة اللي إحنا فيها ..

الناس اللي بقوا في نظرنا رمز للجهل والخرافة والتواكل وضيعان الحق واللا أمل واللي بننسى في غمرة حماسنا إنهم مننا .. أو بمعنى أصح : إحنا اللَّي منُّهم ، الناس اللي دايماً نقعد نشتم فيهم ونلعن جدودهم ونقول يستاهلوا اللي بيجرالهم طالما مش بيتحرَّكوا من غير ما نحاول نبص جوَّاهم بصدق أو نسأل : ليه ؟؟ ليه همَّا بقول كده ؟ .. أو ليه هُمَّا أصلاً كده ؟

محتاج أشوف الناس دي منوَّرين بس ، محتاج أغمَّض عيني عن حاجة وحشة فيهم وحتى عن الفساد اللي شايفه بقى ليه فروع جوَّا قلوبهم ..
عايز أسمع – واسمَّع – صوت فؤاد حدَّاد وهو بيقول :
يا سامعين أبناء بلد واحدة
تحت السما الواحدة وجيل بعد جيل
القاهرة قالت وقولها حق
"أشهد بإنَّك يا ابن آدم جميل"
باني البيوت على بعضها بتميل
في الجو ريق الإنسانيَّة يسيل

أسمعه وهوَّ بيصرخ "مصر دايماً مصر" .. أو وهوَّ بيقول حقيقة " يا أخضر ما يسرح في الملكوت .. إلاَّ الأخضر" .. بعد ما بكى " يا أخضر بقيت كل الألوان إلاَّ الأخضر"

عايز أحكي عن دمعة راجل عجوز نزلت على خده لما حس إن الست اللي عاش معاها خمسين سنة من عمره ممكن تفارقه للرحيل
أحكي عن بنت حلوة ضفيرتها في شعرها وإديها حاضنة كتبها وبسمتها بتنقش أجمل رسمة في لوحة الحياة
عن شاب اتخانق واضرب عشان يحمي بنت بتتعاكس
عن ورد أخضر بيطلع صافي ومزهَّر
عن بوسة على إيد أُم شقيانة أو على كتف أب ضهره محني لكن لسه بيعافر ، وبوسة من عامل فقير على خد ولاده بعد ما رجع بالليل لقاهم نايمين بيقولُّهم فيها كل اللي نفسه فيه وبيتمنَّاهلهم ..
عن بنت حلوة لما بتضحك القمر بيقف عندها ويزيد نوره
عن ولد صُغَيَّر قام لست كبيرة في الأتوبيس وراجل عجوز قام ببنت شابة عشان يحميها وعن إيدها اللي همست لإيده بأصدق كلمة شكر مش منطوقة
عن ( ناس ولاد الأرض ( عود ) .. يسأل على نور الجدود )

عايز أحكي عن مصر لما بتسرق ثواني من بين أنياب الألم في بحر الفساد الكبير .. وتضحك ! لمَّا بتنتزع الجدر الحزين من ليل السنين ونور شمسها بيشرق على خضارها اللي مبقاش باين ..

حاجات كتير حولينا مش بنشوفها لإنها بتجري بسرعة في الاتجاه المُعَاكِس لينا ، لو جمَّعناها جنب بعض هتطلع كلمة واضحة – أو يمكن أنا اللي عايز أشوفها كده ! – بتقول إن مصر المصريَّة ممكن ترجع تغنَّي ونعلَّي معاها صوتنا بالغنا ونقول إن ( مصر دايماً مصر ) .. ونشهد على قول القاهرة "بإن ابن آدم جميل"

هناك 10 تعليقات:

مصرى يقول...

كتير فعلا إختلفت و إتخانقت معاهم بسبب الهجوم الشعب
كلمة والدي المفضلة الشعب ماعندوش وعي حاسسها كلمة ظالمة جدا يعني إيه ماعندوش وعي الحكم الحاد ده صدر على أي أساس و إيه الحد الفاصل بين وجود الوعي و إنعدامه
و كمان مقالات إبراهيم عيسى مع إحترامي ليه بيتجنى ع الشعب جدا
كلمات كتير من نوعية الشعب مات الشعب مابيتحركش الشعب جاهل سمعتها كتير و كل مرة تثير حفيظتي على الشخص اللي بيقولها

مع إن فعلا أشهد يا إبن آدم إنك جميل

karakib يقول...

كلامك حلو

عاشقة الوطن يقول...

ابن ادم فعلا جميل بس اللى يفهمه صح هو اللى يقدر يقول انه فعلا جميل
البنى ادم جميل فى حاجات كتير واحنا مغمضيين عنينا عنها ياترى مغمضيين عشان احنا عاوزين نغمض ولا عشان العيب فينا ان احنا من الناس ديه ومش عارفين احنا ايه بالظبط ولا احنا برضه زى الناس ديه ممكن تغلط

الناس هما برضه الناس
وناس عن ناس تفرق
وأكيد فيه الحلو وأكيد فيه الوحش
واللى أكيد برضه احنا من الناس ديه اللى احنا شغالين نقض فيهم ليل نهار


تحياتى يامحمد على كلامك الجميل جدااااا
وعلى المدونة اللى هى بداية لاشراقة جديدةوأمل كبير

محمد المصري يقول...


يحيى

عموماً بقى عندي شعور إننا بنداري جزء من ضعفنا الداخلي وشعورنا إننا مش قادرين نعمل حاجة بإننا نهاجم الشعب ونشتمه بكل الكلام الممكن واللي مش ممكن ..
أنا مش معترض على انتقاد شعب جذوره ضربة في التاريخ ، مش دي المشكلة .. جمال حمدان مثلاً وصل لإن الشعب المصري إلى حد كبير غير قابل للثورة ، أنا مش معترض ، لكن اللي نفسي يكون إننا نحاول نفهم طبيعة شعب .. نحاول نبحث عن إجابة بدل ما نفضل ندور حوالين السؤال من غير ما نطرحه أصلاً !
الشعب المصري - كأي شعب - في مكوَّنات أثرت فيه وظروف تاريخيَّة وجغرافية كونت شخصيته العبقريَّة - بدون مبالغة - ، ورمي كل ده ورا ضهرنا والاكتفاء بكلمة إن الشعب ( قرني ، أو قابل للاستحمار ) والكثير من المصطلحات دي هوَّ اللي بشعر فيها بمبغالاة ومبالغة ورغبة في مداراة عجزنا على التغيير - بالمناسبة إبراهيم عيسى عمره ما نزل مظاهرة في نفس الوقت اللي بينتقض فيه الشعب لإنه مبيتحرَّكش - مجرَّد ملحوظة -

وفي النهاية فعلاً برجع أشهد بإن ابن آدم - مهما تغيَّرت طباعه - في الأصل جميل ..

وبالمناسبة أشهد لك انتَ كمان بإنَّك ابن آدم جميل :)
وجودك أسعدني جداً

محمد المصري يقول...


كراكيب

شاكر جداً وجود حضرتك

محمد المصري يقول...


رضوى

أكرر شكري ليكِ مرَّة تانية :) ، بجد أسعدني تواجدك

أتمنَّى أكون عند حُسن ظنَّك

والسلام ليسَ الختام
محمد المصـري

yasmina يقول...

عموما هذا الكلام ليس في مصر فقط
فعندما ترى الدنيا ضاقت بالواحد فهو يشتم ويلعن الناس
ولكن كلامك سليم
لان الانسان يجب ان يعتبر من حياته وياخذ الايجابيات من كل شيء ومصر حلوة وناسها حلوين بس تعقيدات الحياة المعاصرة ماثرة في الجميع
كن متفائلا واستمر هكذا
تحياتي

محمد المصري يقول...
أزال المؤلف هذا التعليق.
محمد المصري يقول...


ياسمينا

متفق معاكي في العموم إن الكلام ده فعلاً مش في مصر بس ، يمكن لإننا - كعرب بشكل عام - اتعودنا نتكلم أكتر ما نسمع .. ونكتب قبل ما نفهم .. ونجلد ذواتنا قبل ما نفهم نفسنا صح ..

سعيد جداً بوجود حد زيَّك مؤمن لقضيته وبيحاول يعمل حاجة قدر استطاعته
وسعيد كمان بزيارتك وكلامك

أما عن التفاءل ، متقلقيش ، موجود منه كتير وبيدعمه إيمان قوي بحقيقة الحياة والبشر اللي فيها ..

شكراً يا ياسمينا مرَّة تانية :)

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول